ഇത് 58 കിലോയുണ്ടെന്ന് പറഞ്ഞാൽ വിശ്വസിക്കുമോ! ഞാൻ വെറും 44കിലോ; ഗൗൺ കണ്ട് വാ പൊളിച്ചു പോയെന്ന് എസ്തർ 

ഫോട്ടോഷൂട്ടിനായി ഒരുക്കിവച്ചിരുന്ന ​ഗൗൺ കണ്ട് അക്ഷരാർത്ഥത്തിൽ താൻ വാ പൊളിച്ചുപോയെന്ന് പറയുകയാണ് മലയാളത്തിന്റെ പ്രിയ താരം എസ്തർ അനിൽ. ആദ്യ കാഴ്ചയിൽ തന്നെ ​ഗൗൺ മനസ്സ് കീഴടക്കിയെന്നാണ് താരം പറയുന്നത്. ഇൻസ്റ്റ​ഗ്രാമിൽ ഫോട്ടോഷൂട്ട് ചിത്രങ്ങളും വിഡിയോയും എസ്തർ പങ്കുവച്ചു. 

‘‘58 കിലോ ഭാരമുള്ള ഒരു ഗൗൺ ആണു ഞാൻ ധരിച്ചിരിക്കുന്നതെന്നു നിങ്ങൾ വിശ്വസിക്കുമോ ? അതായത് എന്റെ ഭാരമായ 44 കിലോയേക്കാൾ കൂടുതൽ ?അവർ ഈ ഗൗൺ റൂമിലേക്ക് കൊണ്ടു വന്നപ്പോൾ തന്നെ ഞാൻ വാ തുറന്നു പോയി. ആദ്യ കാഴ്ചയിൽതന്നെ അത്രയേറെ അമ്പരന്നു. ഈ ഗൗൺ നിർമിക്കാൻ 30 ദിവസങ്ങൾ വേണ്ടി വന്നു. ഒരുപാട് പാഷനും സ്നേഹവും ഇതിന്റെ നിർമാണത്തിലുണ്ടെന്ന് എനിക്കുറപ്പാണ്", ചിത്രങ്ങൾക്കൊപ്പം എസ്തർ കുറിച്ചു. 

ഡമൻസ് ഡിസൈൻസ് എന്ന ബൊട്ടീക്ക് ആണ് ഗൗൺ ഒരുക്കിയത്. ഹോട്ട് കൗച്ചർ കസ്റ്റം ഡിസൈനിലാണ് ഈ പർപ്പിൾ പിങ്ക് ഗൗൺ ഒരുക്കിയത്. 1000 മീറ്റർ മെറ്റീരിയലാണ് ഗൗണിനായി ഉപയോഗിച്ചിരിക്കുന്നത്. 2-15 ഇഞ്ച് പാനൽ ഡിസൈനും 60 ഇഞ്ച് ഗൗൺ ട്രെയിനുമാണ് ഇതിലെ പ്രധാന ആകർഷണം.

സെലിബ്രിറ്റി മേക്കപ്പ് ആർട്ടിസ്റ്റായ ജോ ആൺ എസ്തറിനെ ഒരുക്കിയിരിക്കുന്നത്. ളനിയപ്പൻ സുബ്രഹ്മണ്യമാണ് ഫോട്ടോഗ്രഫി.