പോരാട്ടം അവസാനിപ്പിച്ച് അവൻ കോവിഡിന് കീഴടങ്ങി; സഹോദരന്റെ മരണത്തെക്കുറിച്ച് വികാരാധീനയയായി നടി മഹി വിജ് 

കോവിഡ് ബാധിച്ച് ചികിത്സയിലായിരുന്ന സഹോദരന്‍ മരണത്തിന് കീഴടങ്ങിയെന്ന് നടി മഹി വിജ്. വികാരഭരിതമായ കുറിപ്പിലൂടെയാണ് സഹോദരന്റെ വിയോ​ഗം നടി പങ്കുവച്ചത്. കുറച്ച് ദിവസങ്ങള്‍ പിന്നിലേക്ക് പോയി നിന്നെയൊന്നും മുറുക്കെ കെട്ടിപിടിക്കാന്‍ ആഗ്രഹിക്കുന്നു. ഞങ്ങള്‍ നിന്നെ സ്‌നേഹിച്ചിരുന്നു പക്ഷെ ദൈവം അതിനേക്കാളേറെ സ്‌നേഹിക്കു, സഹോദരന്റെ ചിത്രത്തിനൊപ്പം നടി കുറിച്ചതിങ്ങനെ. 

വൈറസ് ബാധ സ്ഥിരീകരിച്ച് ചികിത്സയിൽ പ്രവേശിപ്പിച്ച സഹോദരന് കിടക്ക ലഭിക്കാനായി മഹി സഹായം അഭ്യര്‍ഥിച്ചിരുന്നു. പിന്നീട് നടൻ സോനു സൂദാണ് വേണ്ട സഹായങ്ങൾ ഒരുക്കിയത്. സോനുവും 25കാരനായ മഹിയുടെ സഹോദരന്റെ വിയോ​ഗത്തെക്കുറിച്ച് പങ്കുവച്ചിട്ടുണ്ട്. 

രക്ഷപെടാനുള്ള സാധ്യത വളരെ കുറവാണെന്ന് അറിഞ്ഞിട്ടും നിരന്തരം ഡോക്ടര്‍മാരുമായി സംസാരിച്ചിരുന്നെന്നും യാഥാര്‍ത്ഥ്യത്തെക്കുറിച്ച് അവന്റെ മാതാപിതാക്കളോട് തുറന്നുപറയാനുള്ള ധൈര്യം ഉണ്ടായിരുന്നില്ലെന്നും സോനു കുറിച്ചു. 

സംഗീത് ശിവന്റെ മമ്മൂട്ടി ചിത്രമായ അപരിചിതനിലൂടെ മഹി മലയാള സിനിമയിൽ അഭിനയിച്ചിട്ടുണ്ട്. സിനിമയില്‍ ഇപ്പോള്‍ അത്ര സജീവമല്ല.