സാജൻ വില്ലയിലെ അമ്മച്ചിയെ കാണാൻ അജു വീണ്ടുമെത്തി, ആദ്യമായി അഭിനയിച്ച രം​ഗങ്ങൾ മൊബൈലിൽ കാണിച്ചു; വിഡിയോ

അജു വർ​ഗീസ് പ്രധാന വേഷത്തിൽ എത്തിയ സാജൻ ബേക്കറി ഇന്നലെയാണ് പ്രേക്ഷകരിലേക്ക് എത്തിയത്. ബേക്കറിയെക്കുറിച്ച് പറയുന്ന കഥയിൽ അജുവും ലെനയുമാണ് പ്രധാന വേഷത്തിലെത്തുന്നത്. പത്തനംതിട്ട റാന്നി കേന്ദ്രീകരിച്ചായിരുന്നു ചിത്രത്തിന്റെ ഷൂട്ട്. ചിത്രത്തിന് ആ നാടുമായുള്ള ബന്ധത്തെക്കുറിച്ച് അജു വാചാലനായിട്ടുണ്ട്. ഇപ്പോൾ ഇതാ സിനിമ റിലീസിന് തൊട്ടുമുൻപ് ആ നാട്ടിലേക്ക് തിരിച്ചെത്തിയിരിക്കുകയാണ് താരം. ചിത്രത്തിൽ താരത്തിന്റെ കഥാപാത്രം താമസിക്കുന്ന വീട്ടിലേക്കാണ് മടങ്ങിയെത്തിയത്. അവിടെ താമസിക്കുന്ന അമ്മച്ചി ചിത്രത്തിൽ അഭിനയിച്ചിട്ടുണ്ട്. അമ്മച്ചിയെ അഭിനയിച്ച രം​ഗങ്ങൾ കാണിച്ചുകൊടുക്കാനാണ് അജു എത്തിയത്. വിഡിയോയിലൂടെയാണ് താരം സന്തോഷം പങ്കുവെച്ചത്. 

ഞങ്ങളുടെ സാജൻ വില്ല;  അവിടെ താമസിക്കുന്നത് രോഹിത്തും  അവന്റെ അമ്മയും അമ്മച്ചിയും ! ഈ അമ്മച്ചി ഞങ്ങളുടെ സിനിമയിൽ അഭിനയിച്ചിട്ടുണ്ട്, ജീവിതത്തിൽ ആദ്യമായിട്ട്. !!! അമ്മച്ചി അഭിനയിച്ച സീൻസ്‌ അമ്മച്ചിയെ കാണിക്കാൻ പോയ നിമിഷങ്ങൾ. !!!! ഈ വീട് എനിക്ക് അത്ര ഏറെ പ്രിയപ്പെട്ടതാണ്! വീട്‌ മാത്രമല്ല ,  ഈ നാടും! ഇന്ന് ഈ നിമിഷം ഈ സിനിമ കുടുംബങ്ങളിലും എത്തുമെന്ന് സിനിമ കണ്ടവർ പറയുമ്പോ തീർച്ചയായിട്ടും ഈ സിനിമയുടെ ESSENCE, അത് നിങ്ങൾ ഇപ്പൊ ഈ കാണുന്നതാണ്..- എന്ന കുറിപ്പിലാണ് വിഡിയോ പങ്കുവെച്ചത്. 

അരുൺ ചന്ദു സംവിധാനം ചെയ്യുന്ന ഈ ചിത്രത്തിൽ പുതുമുഖം രഞ്ജിത മേനോന്‍ നായികയാകുന്നു. ഗ്രേസ് ആന്റണി, കെ.ബി.  ഗണേഷ് കുമാർ,ജാഫര്‍ ഇടുക്കി,രമേശ് പിഷാരടി,ജയന്‍ ചേര്‍ത്തല,സുന്ദര്‍ റാം, എന്നീ പ്രമുഖ താരങ്ങള്‍ക്കൊപ്പം ഒട്ടേറേ പുതുമുഖങ്ങളും ഈ ചിത്രത്തില്‍ അഭിനയിക്കുന്നു. അജു വർഗീസ്,അരുൺ ചന്തു,സച്ചിന്‍ ആര്‍ ചന്ദ്രന്‍ എന്നിവര്‍ ചേർന്നാണ് തിരക്കഥയും സംഭാഷണവുമൊരുക്കുന്നത്​.