'മനുഷ്യനെ എടുത്ത് ആരതി ഉഴിയുന്നു, ഇതൊക്കെ ബാലയ്യയെ കൊണ്ടേ പറ്റൂ'; വീണ്ടും ട്രോളുകളിൽ നിറഞ്ഞ് അഖണ്ഡ 2

ബാലയ്യയുടേതായി ആരാധകർ കാത്തിരിക്കുന്ന ചിത്രമാണ് അഖണ്ഡ 2. ചിത്രം റിലീസിനൊരുങ്ങുകയാണ്. സൂപ്പർ ഹിറ്റായി മാറിയ അഖണ്ഡയുടെ രണ്ടാം ഭാ​ഗമാണിത്. ബോയപതി ശ്രീനു സംവിധാനം ചെയ്യുന്ന ചിത്രം ഒരു ആക്ഷൻ എന്റർടെയ്‌നറായാണ് ഒരുങ്ങുന്നത്. ചിത്രത്തിന്റെ റിലീസ് ടീസറാണിപ്പോൾ ആരാധകർക്കിടയിൽ ശ്രദ്ധേയമാകുന്നത്. ടീസറിലെ ചില രം​ഗങ്ങൾക്ക് വൻ ട്രോളുകളാണ് ലഭിക്കുന്നതും.

ടീസറിൽ ഒരു മനുഷ്യനെ തലകീഴായി ബാലയ്യ തൂക്കിയെടുത്ത് ആരതി ഉഴിയുന്നത് കാണാം. മാത്രമല്ല സിനിമയിലെ മറ്റു ഫൈറ്റ് സീനുകളും ഇത്തരത്തിൽ ഓവർ ദ് ടോപ് ആയിട്ടാണ് ഒരുക്കിയിരിക്കുന്നത്. രസകരമായ നിറയെ കമന്റുകളാണ് വിഡിയോയ്ക്ക് താഴെ വരുന്നത്.

'ബാലയ്യയ്ക്ക് മാത്രമേ ഇത്തരം കാര്യങ്ങൾ ചെയ്യാൻ സാധിക്കൂ', 'സിനിമകൾ ഇത്ര മുന്നേറിയിട്ടും ബാലയ്യക്ക് ഒരു മാറ്റവും ഇല്ല' എന്നിങ്ങനെയാണ് വിഡിയോക്ക് ലഭിക്കുന്ന കമന്റുകൾ. നാളെ ആണ് ചിത്രം റിലീസിന് എത്തുന്നത്. നേരത്തെ ഡിസംബർ അഞ്ചിന് റിലീസിന് തയ്യാറെടുത്തു എങ്കിലും അവസാനം നിമിഷം സിനിമയുടെ റിലീസ് മാറ്റിവെക്കുകയായിരുന്നു.

ആദ്യ ഭാഗത്തേക്കാൾ വമ്പൻ കാൻവാസിൽ ആണ് ഈ രണ്ടാം ഭാഗം ഒരുക്കിയിരിക്കുന്നത്. സംയുക്ത മേനോൻ ആണ് ചിത്രത്തിലെ നായിക. പാൻ ഇന്ത്യൻ ചിത്രമായി ബ്രഹ്മാണ്ഡ ബജറ്റിൽ ഒരുക്കുന്ന ചിത്രത്തിലെ വില്ലൻ വേഷം അവതരിപ്പിക്കുന്നത് ആദി പിന്നിസെട്ടിയാണ്.

ബോളിവുഡ് താരം ഹർഷാലി മൽഹോത്രയും ചിത്രത്തിന്റെ താരനിരയിലുണ്ട്. 14 റീൽസ് പ്ലസിന്‍റെ ബാനറിൽ രാം അചന്തയും ഗോപിചന്ദ് അചന്തയും ചേർന്ന് നിർമ്മിക്കുന്ന ചിത്രം എം തേജസ്വിനി നന്ദമൂരി അവതരിപ്പിക്കുന്നു. രചന, സംവിധാനം ബോയപതി ശ്രീനു, നിർമ്മാതാക്കൾ രാം അചന്ത, ഗോപി അചന്ത. എസ് തമനാണ് ചിത്രത്തിന് സം​ഗീതമൊരുക്കുന്നത്.