'പാച്ചുവും അദ്ഭുതവിളക്കും'; അഖിൽ സത്യന്റെ കന്നി ചിത്രം ഫഹദിനൊപ്പം 

‍
സംവിധായകൻ സത്യൻ അന്തിക്കാടിന്റെ മകൻ അഖിൽ സത്യൻ സംവിധാനം ചെയ്യുന്ന ആദ്യചിത്രത്തിൽ ഫഹദ് ഫാസിൽ നായകൻ. 'പാച്ചുവും അത്ഭുതവിളക്കും' എന്നാണ് ചിത്രത്തിന്റെ പേര്. ചിത്രത്തിന്റെ കഥയും തിരക്കഥയും അഖില്ലിന്റേത് തന്നെയാണ്.

മുംബൈ, ഹൈദരാബാദ്, ഗോവ, കേരളം എന്നിവിടങ്ങളിൽ ആണ് സിനിമയുടെ ലൊക്കേഷൻ. മുംബൈയിലെ ചിത്രീകരണം കോവിഡ് വ്യാപനത്തിന് മുമ്പ് പൂർത്തിയാക്കി. മറ്റിടങ്ങളിലെ ഷൂട്ടിങ് ഏപ്രിലിൽ പുനഃരാരംഭിക്കും. 

പത്ത് വർഷത്തോളം അച്ഛന്റെ അസോസിയേറ്റായി പ്രവർത്തിച്ച അഖിൽ നിരവധി പരസ്യചിത്രങ്ങൾ ഒരുക്കിയിട്ടുണ്ട്. അദ്ദേഹത്തിന്റെ ഡോക്യുമെന്ററികൾ രാജ്യാന്തര ബഹുമതികൾ നേടിയിട്ടുണ്ട്. അഖിലിന്റെ ഇരട്ടസഹോദരൻ അനൂപിന്റെ ആദ്യ സിനിമ വരനെ ആവശ്യമുണ്ട് കഴിഞ്ഞ വർഷം ആദ്യം റിലീസ് ചെയ്തിരുന്നു. സുരേഷ് ​ഗോപി, ശോഭന, ദുൽഖർ, കല്ല്യാണി പ്രിയദർശൻ, ഉർവശി തുടങ്ങി വലിയ താരനിരയുമായി എത്തിയ ചിത്രം തിയറ്ററുകളിൽ മികച്ച വിജയം നേടി.