'രാമായണ'യെ പ്രശംസിച്ച് വിരാട് കോഹ്‌ലി? വൈറലായ ഇൻസ്റ്റഗ്രാം സ്റ്റോറി വ്യാജമെന്ന് റിപ്പോർട്ട്

നിതേഷ് തിവാരി സംവിധാനം ചെയ്ത് രൺബീർ കപൂർ നായകനായെത്തിയ 'രാമായണ'യെ പ്രശംസിച്ച് ഇന്ത്യൻ ക്രിക്കറ്റ് താരം വിരാട് കോഹ്‌ലി ഇൻസ്റ്റഗ്രാം സ്റ്റോറി പങ്കുവച്ചെന്ന വാർത്ത കഴിഞ്ഞ ദിവസം സോഷ്യൽ മീഡിയയിൽ വൈറലായിരുന്നു. ചിത്രത്തെക്കുറിച്ച് കോഹ്‌ലി പങ്കുവച്ചതെന്ന് അവകാശപ്പെടുന്ന സ്ക്രീൻഷോട്ടാണ് എക്സ് ഉൾപ്പെടെയുള്ള പ്ലാറ്റ്‌ഫോമുകളിൽ പ്രചരിച്ചത്. എന്നാൽ ഈ പ്രചാരണം വ്യാജമാണെന്നാണ് ഇപ്പോൾ പുറത്തുവരുന്ന വിവരം.

ചിത്രത്തെ പ്രശംസിച്ചുകൊണ്ട് ഇസ്റ്റ​ഗ്രാമിൽ കോഹ്‌ലി പങ്കുവെച്ച സ്റ്റോറിയുടെ സ്ക്രീൻഷോട്ടാണ് വ്യാപകമായി പ്രചരിച്ചിരുന്നത്. എന്നാൽ വെരിഫൈഡ് അക്കൗണ്ടിൽ അത്തരമൊരു സ്റ്റോറി ക​ണ്ടിരുന്നില്ല. ഇതോടെ കോഹ്‌ലിയുടെ പേരിലുള്ള വൈറൽ സ്ക്രീൻഷോട്ടിന്റെ ആധികാരികതയിൽ സംശയം ഉയർന്നു.

നിരവധി പേർ എക്സിലെ എഐ ചാറ്റ്ബോട്ടായ ഗ്രോക്കിനോട് ഇതിന്റെ സത്യാവസ്ഥ അന്വേഷിച്ചിരുന്നു. പ്രചരിക്കുന്ന ഇൻസ്റ്റഗ്രാം സ്റ്റോറി വ്യാജമാണെന്നും കോഹ്‌ലി ഇത്തരമൊരു പ്രശംസ പങ്കുവച്ചതിന് വിശ്വസനീയമായ തെളിവുകളൊന്നുമില്ലെന്നുമാണ് ഗ്രോക്ക് നൽകിയ മറുപടി. അദ്ദേഹം ചിത്രത്തെ പ്രശംസിച്ചതായി പറയുന്ന വിശ്വസനീയമായ മാധ്യമ റിപ്പോർട്ടുകളോ ഔദ്യോഗിക സ്ഥിരീകരണമോ ഇല്ലെന്നും മറുപടിയിൽ പറയുന്നു.

അതേസമയം, ഈ ആഴ്ച കോഹ്‌ലി പങ്കുവച്ചതായി റിപ്പോർട്ട് ചെയ്യപ്പെട്ട ഇൻസ്റ്റഗ്രാം സ്റ്റോറി ദീപാവലി ആശംസയുമായി ബന്ധപ്പെട്ടതായിരുന്നു. സന്തോഷവും സമൃദ്ധിയും നിറഞ്ഞ ദീപാവലി ആശംസിച്ചുകൊണ്ടുള്ള സന്ദേശമാണ് അദ്ദേഹം പങ്കുവച്ചത്.

നവംബർ നാലിന് ന്യൂസിലൻഡിനെതിരായ ആദ്യ ഏകദിന മത്സരത്തിൽ കോഹ്‌ലി ഒരു കൈകൊണ്ട് മനോഹരമായ ക്യാച്ചെടുത്തിരുന്നു. പിന്നാലെ അമ്പും വില്ലും ഉപയോഗിച്ച് അസ്ത്രം തൊടുക്കുന്നതുപോലെയുള്ള ആഘോഷവും നടത്തി. ഇതും 'രാമായണ'യുമായി ബന്ധപ്പെടുത്തി ആരാധകർക്കിടയിൽ ചർച്ചയായിരുന്നു. എന്നാൽ ആ ആഘോഷത്തിന് ചിത്രവുമായി ബന്ധമുണ്ടെന്ന് കോഹ്‌ലി സ്ഥിരീകരിച്ചിട്ടില്ല.

അതേസമയം, തിയറ്ററുകളിൽ മികച്ച പ്രകടനമാണ് 'രാമായണ' കാഴ്ചവയ്ക്കുന്നത്. രൺബീർ കപൂർ ശ്രീരാമനായും സായ് പല്ലവി സീതയായും യഷ് രാവണനായും എത്തുന്ന ചിത്രം നവംബർ അഞ്ചിനാണ് റിലീസ് ചെയ്തത്. അഞ്ചു ദിവസത്തിനുള്ളിൽ ഇന്ത്യയിൽ നിന്ന് 300 കോടി രൂപയിലധികം ചിത്രം കളക്ട് ചെയ്തതായി റിപ്പോർട്ടുകളുണ്ട്. വിരാട് കോഹ്‌ലി ചിത്രത്തെ പ്രശംസിച്ചെന്ന പ്രചാരണം ആരാധകർക്കിടയിൽ വലിയ ചർച്ചയായെങ്കിലും അതിന് സ്ഥിരീകരണമില്ലെന്നാണ് നിലവിലെ വിവരം.