ക്ലൈമാക്സ് രം​ഗങ്ങൾ മൊബൈലിൽ ഷൂട്ട് ചെയ്ത് പ്രചരിപ്പിച്ചു; അസിസ്റ്റന്റ് ഡയറക്ടർക്കെതിരെ പരാതിയുമായി സംവിധായകൻ

കൊച്ചി: ശ്രീനാഥ് ഭാസി നായകനായെത്തി റിലീസിനൊരുങ്ങുന്ന പൊങ്കാല എന്ന ചിത്രത്തിന്റെ അസിസ്റ്റന്റ് ഡയറക്ടർക്കെതിരെ പരാതിയുമായി സംവിധായകൻ. എ ബി ബിനിൽ. അസിസ്റ്റന്റ് ഡയറക്ടർ ഫൈസൽ ഷായ്ക്കെതിരെയാണ് സംവിധായകൻ ബിനിൽ പാലാരിവട്ടം പൊലീസ് സ്റ്റേഷനിൽ പരാതി നൽകിയിരിക്കുന്നത്.

ചിത്രത്തിന്റെ പ്രധാന രം​ഗങ്ങളുൾപ്പെടെ മൊബൈലിൽ ഷൂട്ട് ചെയ്ത് സമൂഹമാധ്യമങ്ങളിലടക്കം പ്രചരിപ്പിച്ചു എന്നാണ് ബിനിൽ പരാതി നൽകിയിരിക്കുന്നത്. അടിയന്തരമായി ഫൈസൽ ഷായ്ക്കെതിരെ കേസെടുക്കണമെന്നും സംവിധായകൻ ആവശ്യപ്പെട്ടിട്ടുണ്ട്. സിനിമയുടെ ചിത്രീകരണം പുരോഗമിക്കുകയാണ്.

ഗ്ലോബൽ പിക്ചേഴ്സ് എന്റർടെൻമെന്റ്സിന്റെ ബാനറിൽ ഡോണ തോമസ്, ദീപു ബോസ്, അനിൽ പിള്ള എന്നിവരാണ് ചിത്രം നിർമിക്കുന്നത്. ശ്രീനാഥ് ഭാസി നായകനാകുന്ന ചിത്രത്തിൽ ബാബുരാജ്, കിച്ചു ടെല്ലസ്, സമ്പത്ത് റാം, അലൻസിയർ, സുധീർ കരമന, ഇന്ദ്രജിത്ത് ജഗജിത്ത്, സൂര്യ കൃഷ്, മുരുകൻ മാർട്ടിൻ, ജീമോൻ ജോർജ്, ഷെജിൻ,യാമി സോനാ, സ്മിനു സിജോ, രേണു സുന്ദർ, ശാന്തകുമാരി എന്നിവരും അഭിനയിക്കുന്നു.