'മഴവില്‍ക്കാവടിയുടെ ലൊക്കേഷന്‍ തേടി നടന്ന കാലത്ത് ഞാന്‍ കണ്ട ഗ്രാമങ്ങള്‍'; പ്രശംസിച്ച്‌ സത്യൻ അന്തിക്കാട്

മികച്ച പ്രേക്ഷക പ്രതികരണം ലഭിച്ച ലിജോ ജോസ് പെല്ലിശേരിയുടെ 'നൻപകൽ നേരത്ത് മയക്കം' എന്ന ചിത്രത്തെ പ്രശംസിച്ച് സംവിധായകൻ സത്യൻ അന്തിക്കാട്. ഉച്ചമയക്കത്തിൽ കണ്ട ഒരു സ്വപ്നം പോലെയാണ് സിനിമ. മമ്മൂട്ടിയുടെ മികച്ച പ്രകടനം ഒരിക്കൽ കൂടി കാണാൻ സാധിച്ചെന്നും സത്യൻ അന്തിക്കാട് ഫേസ്ബുക്കിൽ കുറിച്ചു. മുൻപ് പഴനിയിൽ മഴവിൽക്കാവടിയുടെ ലോക്കേഷൻ തിരക്കി പോയിട്ടുണ്ട്. ആ​ ​ഗ്രാമ ഭം​ഗിയെ ലിജോ അതുപോലെ ഒപ്പിയെടുത്തിട്ടുണ്ടെന്നും അദ്ദേഹം പറഞ്ഞു. 

സത്യൻ അന്തിക്കാടിന്റെ ഫേസ്ബുക്ക് പോസ്റ്റ്

"നൻപകൽ നേരത്ത് മയക്കം" കണ്ടു. ഉച്ചമയക്കത്തിലെ സ്വപ്നം പോലൊരു സിനിമ. എത്ര മനോഹരമായാണ് ജെയിംസിന്റേയും സുന്ദരത്തിന്റേയും കഥ ലിജോ പറഞ്ഞത്.

പണ്ട് 'മഴവിൽക്കാവടി'യുടെ ലൊക്കേഷൻ തേടി നടന്ന കാലത്ത് പഴനിയിലെ ഗ്രാമങ്ങൾ ഞാൻ കണ്ടിട്ടുണ്ട്. ചോളവയലുകളും ഗ്രാമവാസികൾ ഇടതിങ്ങിപ്പാർക്കുന്ന കൊച്ചു വീടുകളും, രാപകലില്ലാതെ അലയടിക്കുന്ന തമിഴ്പാട്ടുകളും....

ആ ഗ്രാമഭംഗി മുഴുവൻ ലിജോ ഒപ്പിയെടുത്തിരിക്കുന്നു. മമ്മൂട്ടി എന്ന അതുല്യനടന്റെ വിസ്മയിപ്പിക്കുന്ന പ്രകടനം വീണ്ടും കാണാൻ സാധിച്ചു.
ജെയിംസിന്റെ നാടകവണ്ടി ഗ്രാമം വിട്ടുപോകുമ്പോൾ പിന്നാലെയോടുന്ന സുന്ദരത്തിന്റെ വളർത്തുനായയുടെ ചിത്രം ഇപ്പോഴും ഒരു നൊമ്പരമായി മനസ്സിൽ! ലിജോ ജോസ് പെല്ലിശ്ശേരിക്കും ടീമിനും മനസ്സു നിറഞ്ഞ സ്നേഹം

ഈ വാര്‍ത്ത കൂടി വായിക്കൂ 

വെറും നിലത്ത് തളർന്നു കിടന്നുറങ്ങുന്ന മമ്മൂട്ടി, ആ നിമിഷത്തെ ഫ്രെയിമിലാക്കി ജോർജ്

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ