ഈ ആഴ്ച സിനിമ കണ്ട് മടുക്കുമല്ലോ! ഡ്യൂഡും അവിഹിതവുമുൾപ്പെടെ ഒടിടിയിൽ സിനിമാ പൂരം

തിയറ്റർ റിലീസ് പോലെ തന്നെ ഒടിടി റിലീസുകൾക്കായും സിനിമാ പ്രേമികൾ കാത്തിരിക്കാറുണ്ട്. പോയവാരം മികച്ച ഒരുപിടി ചിത്രങ്ങളാണ് വിവിധ പ്ലാറ്റ്ഫോമുകളിലായി പ്രേക്ഷകർക്ക് മുന്നിലെത്തിയത്. ഈ വാരാന്ത്യത്തിലും നിങ്ങൾ കാത്തിരുന്ന ചിത്രങ്ങൾ തന്നെയാണ് സ്ട്രീമിങ്ങിനെത്തുന്നത്. ഡ്യൂഡ്, അവിഹിതം, ബൈസൺ തുടങ്ങി നിരവധി ചിത്രങ്ങളാണ് നിങ്ങളിലേക്ക് ഈ ആഴ്ച എത്തുക. ഈ ആഴ്ചയിലെ പുത്തൻ ഒടിടി റിലീസുകൾ ഏതൊക്കെയാണെന്ന് നോക്കിയാലോ.

പ്രദീപ് രംഗനാഥൻ, മമിത ബൈജു എന്നിവർ നായികാനായകൻമാരായെത്തിയ ഡ്യൂഡ് ആണ് ഈ വാരം ഒടിടിയിൽ പുറത്തിറങ്ങുന്ന പ്രധാന സിനിമകളിൽ ഒന്ന്. സിനിമ 100 കോടി ക്ലബ്ബിൽ ഇടം പിടിച്ചിരുന്നു. നവംബർ 14 മുതൽ സിനിമ സ്ട്രീമിങ് ആരംഭിക്കും. നെറ്റ്ഫ്ലിക്സിലൂടെയാണ് സിനിമ പ്രേക്ഷകർക്ക് മുന്നിലേക്ക് എത്തുന്നത്. പുറത്തിറങ്ങി 28ാമത്തെ ദിവസമാണ് ചിത്രം പ്രേക്ഷകർക്ക് മുന്നിലേക്ക് എത്തുന്നത്. തമിഴിലെ മമിതയുടെ ആദ്യ 100 കോടി കൂടെയാണ് സിനിമ.

തിങ്കളാഴ്ച നിശ്ചയം എന്ന ഹിറ്റ് സിനിമയൊരുക്കിയ സെന്ന ഹെ​ഗ്ഡെ സംവിധാനം ചെയ്ത ചിത്രമാണ് അവിഹിതം. ഒക്ടോബർ 10 ന് തിയറ്ററുകളിലെത്തിയ ചിത്രം തിയറ്ററുകളിൽ നിന്ന് മികച്ച അഭിപ്രായവും നേടിയിരുന്നു. ഇപ്പോഴിതാ ചിത്രം ഒടിടി റിലിസീനൊരുങ്ങുകയാണ്. ജിയോ ഹോട്ട് സ്റ്റാറിലൂടെയാണ് ചിത്രം സ്ട്രീമിങ്ങിനെത്തുക. നവംബര്‍ 14ന് അവിഹിതം സ്ട്രീമിങ് ആരംഭിക്കും. ഉണ്ണിരാജ ചെറുവത്തൂരും യുവനടൻ രഞ്ജിത്ത് കങ്കോലുമാണ് അവിഹിതത്തിലെ കേന്ദ്ര കഥാപാത്രങ്ങളെ അവതരിപ്പിക്കുന്നത്. വിനീത് ചാക്യാർ, ധനേഷ് കോലിയാത്ത്, രാകേഷ് ഉഷാർ, വൃന്ദ മേനോൻ എന്നിവരും ചിത്രത്തിൽ പ്രധാന വേഷങ്ങളിലെത്തി.

സിദ്ദു ജൊന്നലഗദ്ദ, ശ്രീനിധി ഷെട്ടി, റാഷി ഖന്ന എന്നിവരെ കേന്ദ്രകഥാപാത്രങ്ങളാക്കി നീരജ കോണ ഒരുക്കിയ 'തെലുസു കദ' നവംബർ 14 മുതൽ സ്ട്രീമിങ് ആരംഭിക്കും. നെറ്റ്ഫ്ലിക്സിലൂടെയാണ് സിനിമ പ്രേക്ഷകർക്ക് മുന്നിലെത്തുന്നത്. സമ്മിശ്ര പ്രതികരണം നേടിയ സിനിമയ്ക്ക് ബോക്സ് ഓഫീസിൽ വലിയ വിജയം നേടാൻ കഴിഞ്ഞിരുന്നില്ല.

അക്ഷയ് കുമാർ ചിത്രമായ ജോളി എൽഎൽബി ത്രീയും ഈ വാരം ഒടിടിയിലെത്തും. ജിയോ ഹോട്ട്സ്റ്റാറിലൂടെയാണ് സിനിമ സ്ട്രീം ചെയ്യുന്നത്. സുഭാഷ് കപൂർ ഒരുക്കിയ സിനിമയിൽ അർഷാദ് വാർസിയും പ്രധാന വേഷത്തിൽ എത്തിയിരുന്നു. ചിത്രം ബോക്സ് ഓഫീസിൽ വിജയിച്ചിരുന്നു. നവംബർ 14ന് ചിത്രം ഒടിടിയിലെത്തും.

കിരൺ അബ്ബാവാരം നായകനായി എത്തിയ 'കെ റാമ്പ്' ആണ് ഒടിടിയിൽ എത്തുന്ന മറ്റൊരു ചിത്രം. ആദ്യ ദിനങ്ങളിൽ വലിയ നെഗറ്റീവ് റിവ്യൂസ് ആയിരുന്നു സിനിമയ്ക്ക് ലഭിച്ചത്. സിനിമയിലെ കോമഡികൾ ക്രിഞ്ച് ആണെന്നും വളരെ മോശമാണ് സിനിമയെന്നുമായിരുന്നു അഭിപ്രായങ്ങൾ. എന്നാൽ പതിയെ പ്രേക്ഷകരിൽ നിന്ന് മികച്ച പ്രതികരണങ്ങൾ നേടിയ സിനിമ ബോക്സ് ഓഫീസിലും കുതിപ്പ് തുടരാൻ ആരംഭിച്ചു. ആഹാ വിഡിയോയിലൂടെയാണ് സിനിമ നവംബർ 15 മുതൽ പ്രേക്ഷകരിലേക്ക് എത്തുന്നത്.

മാരി സെൽവരാജ് സംവിധാനം ചെയ്ത് ധ്രുവ് വിക്രം നായകനായെത്തിയ ചിത്രമാണ് ബൈസൺ. മികച്ച നിരൂപക പ്രശംസയും ചിത്രത്തിന് ലഭിച്ചിരുന്നു. അനുപമ പരമേശ്വരൻ, രജിഷ വിജയൻ എന്നിവരാണ് ചിത്രത്തിൽ നായികമാരായെത്തിയത്. സ്പോർ‌ട്സ് ഡ്രാമയായിട്ടാണ് ചിത്രമൊരുക്കിയിരിക്കുന്നത്. ബൈസണും ഒടിടി റിലീസിനൊരുങ്ങുകയാണ്. നവംബർ 20 മുതൽ ചിത്രം നെറ്റ്ഫ്ലിക്സിൽ‌ സ്ട്രീം ചെയ്യുമെന്നാണ് വിവരം.

ഷെഫാലി ഷാ, ഹുമ ഖുറേഷി എന്നിവർ പ്രധാന വേഷങ്ങളിലെത്തുന്ന സീരിസാണ് ഡൽഹി ക്രൈം സീസൺ 3. കഴിഞ്ഞ ദിവസം സീരിസിന്റെ ട്രെയ്‌ലറും അണിയറപ്രവർത്തകർ പുറത്തുവിട്ടിരുന്നു. മികച്ച സ്വീകാര്യതയാണ് ട്രെയ്‌ലറിന് ലഭിച്ചു കൊണ്ടിരിക്കുന്നത്. നെറ്റ്ഫ്ലിക്സിലൂടെ നവംബർ 13 ന് സീരിസ് സ്ട്രീമിങ് ആരംഭിക്കും.

മലയാളത്തിലെ ആദ്യത്തെ ഹൊറർ കോമഡി വെബ് സീരിസായ ഇൻസ്‌പെക്ഷൻ ബംഗ്ലാവ് ഒടിടി റിലീസിനൊരുങ്ങുന്നു. ഷാജു ശ്രീധർ, ജയൻ ചേർത്തല, വീണ നായർ, ബാലാജി ശർമ്മ, സെന്തിൽ കൃഷ്ണ രാജാമണി, ശ്രീജിത്ത് രവി എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു. വീണ നായർ പ്രൊഡക്ഷൻസിന്റെ കീഴിൽ നടി വീണ നായരാണ് ഈ സീരിസ് നിർമിക്കുന്നത്. ഒരു പൊലീസ് സ്റ്റേഷന് ചുറ്റുമുള്ള അസാധാരണ സംഭവങ്ങളുടെ നർമ്മരൂപത്തിലുള്ള അന്വേഷണമായിരിക്കും ഈ പരമ്പരയെന്നാണ് പോസ്റ്റർ നൽകുന്ന സൂചന. സൈജു എസ്എസ് ആണ് 'ഇൻസ്‌പെക്ഷൻ ബംഗ്ലാവ്' സംവിധാനം ചെയ്യുന്നത്. സീ5 ആണ് ചിത്രത്തിന്റെ സ്ട്രീമിങ് പാർട്ണർ. നവംബർ 14 ന് രാത്രി 12 മണി മുതൽ ഇൻസ്‌പെക്ഷൻ ബംഗ്ലാവ് സീ5 ൽ കാണാം.

ഒട്ടേറെ ആരാധകരുള്ള ഒരു പരമ്പരയാണ് ഫാമിലി മാൻ. 2019 ലാണ് ഫാമിലി മാൻ സീരിസ് റിലീസ് ചെയ്യുന്നത്. ഇപ്പോഴിതാ സീരിസിന്റെ മൂന്നാമത്തെ സീസൺ റിലീസിനൊരുങ്ങുകയാണ്. നവംബർ 21 മുതൽ ആമസോൺ പ്രൈമിലൂടെ സീരിസിന്റെ സ്ട്രീമിങ് ആരംഭിക്കും.