'പത്ത് വർഷത്തിന് ശേഷവും ഞങ്ങളുടെ കപ്പൽ ശക്തമാണ്'; വിവാഹവാർഷിക ദിനത്തിൽ ദുൽഖർ സൽമാൻ

യുവതാരം ദുൽഖർ സൽമാന്റേയും ഭാര്യ അമാൽ സൂഫിയയുടേയും പത്താം വിവാഹവാർഷികമായിരുന്നു ഇന്നലെ. മനോഹരമായ കുറിപ്പിനൊപ്പമാണ് തങ്ങളുടെ ഒരു പതിറ്റാണ്ട് നീളുന്ന മനോഹരമായ യാത്രയെക്കുറിച്ച് താരം പറഞ്ഞത്. പത്ത് വർഷത്തിന് ശേഷവും തങ്ങളുടെ ദാമ്പത്യം കൂടുതൽ ശക്തമാണ് എന്നാണ് ദുൽഖർ കുറിക്കുന്നത്. 

ദുൽഖറിന്റെ കുറിപ്പ്

‘ഞങ്ങളുടെ ഒരു പതിറ്റാണ്ട്. ദിശയില്ലാത്ത ഞങ്ങളെ നയിക്കാന്‍ കാറ്റ് മാത്രമേയുള്ളു. പലപ്പോഴും നേരെ വരുന്ന തിരമാലകളെ മറികടന്ന് പോവുകയാണ്. പരസ്പരം മുറുകെ പിടിച്ച് മുന്നേറുന്നു. ജീവിതം സൃഷ്ടിക്കുകയാണിവിടെ. അത് ഞങ്ങളുടെ ജീവിതമായി മാറുന്നു. വിവിധ തുറമുഖങ്ങളിലൂടെ ഒരുമിച്ചുള്ള യാത്ര ഇനിയും തുടരുകയാണ്. ഒപ്പം പുതിയ ഭൂമി കണ്ടെത്തുക, ഇനിയും ഒരുപാട് കാണാനുണ്ട്. ഒരു ദശാബ്ദത്തിന് ശേഷവും ഞങ്ങളുടെ കപ്പൽ കൂടുതല്‍ ശക്തരാണ്. കപ്പലിന്റെ ചിറകുകള്‍ എപ്പോഴും ഉയര്‍ന്ന് തന്നെ നില്‍ക്കുന്നു. നമ്മുടെ മാലാഖയ്‌ക്കൊപ്പം കൂട്ടില്‍ സുരക്ഷിതരായി നില്‍ക്കുകയാണ്.’–ദുൽഖർ കുറിച്ചു.

ആശംസകളുമായി ആരാധകർ

അമാലിനൊപ്പമുള്ള മനോഹരമായ ചിത്രങ്ങൾക്കൊപ്പമായിരുന്നു ദുൽഖറിന്റെ കുറിപ്പ്. നിരവധി താരങ്ങൾ പ്രിയ ദമ്പതികൾക്ക് ആശംസകൾ അറിയിച്ചുകൊണ്ട് രം​ഗത്തെത്തിയത്. 2011 ഡിസംബർ 22 നായിരുന്നു അമാലും ദുൽഖറും വിവാഹിതരാവുന്നത്. ചെന്നൈ സ്വദേശിയായ അമാല്‍ ആര്‍ക്കിടെക്കാണ്. ഇരുവർക്കും നാല്‌ വയസ്സുള്ള ഒരു മകളുണ്ട്. മറിയം അമീറാ സല്‍മാന്‍.