'ഹൃദയം റിലീസിന് മാറ്റമില്ല; നാളെ തിയേറ്ററിൽ കാണാം'- വിനീത് ശ്രീനിവാസൻ

പ്രണവ് മോഹൻലാൽ നായകനാകുന്ന ഹൃദയത്തിന്റെ റിലീസിന് ഒരു മാറ്റവുമില്ലെന്ന് സംവിധായകൻ വിനീത് ശ്രീനിവാസൻ. ചിത്രം നാളെ തിയേറ്ററുകൾ എത്തും. സാമൂഹിക മാധ്യമത്തിലൂടെയാണ് വിനീത് ഇക്കാര്യം അറിയിച്ചത്. 

'സൺ‌ഡേ ലോക്ക്ഡൗൺ പ്രഖ്യാപനത്തിനു ശേഷം ഹൃദയം മാറ്റി വെച്ചു എന്ന രീതിയിൽ വാർത്ത പരക്കുന്നുണ്ട്. ഹൃദയത്തിന്റെ റിലീസിന് ഒരു മാറ്റവുമില്ല. ഞങ്ങൾ തീയേറ്ററുടമകളോടും വിതരണക്കാരോടും ജനങ്ങളോടും പറഞ്ഞ വാക്കാണത്. ലോകമെമ്പാടുമുള്ള പ്രേക്ഷകർ ഹൃദയം കാണാൻ കാത്തിരിക്കുന്നു എന്നാണ് കഴിഞ്ഞ ദിവസങ്ങളിൽ ഞങ്ങൾക്ക് മനസിലാക്കാൻ കഴിഞ്ഞത്. കോവിഡ് മാനദണ്ഡങ്ങൾ പാലിച്ചു ആവേശപൂർവം സിനിമ കാണാൻ വരൂ. നാളെ തിയേറ്ററിൽ കാണാം. '– വിനീത് അറിയിച്ചു