'നിനക്കുവേണ്ടി ഞാൻ കാത്തിരുന്നത് ഒരു പതിറ്റാണ്ട്'; 1.84 കോടിയുടെ പോർഷെ സ്വന്തമാക്കി മംമ്ത; ചിത്രങ്ങൾ

ഒരു പതിറ്റാണ്ടു നീണ്ടു നിന്ന കാത്തിരിപ്പിനു ശേഷം തന്റെ ഇഷ്ട വാഹനം സ്വന്തമാക്കി നടി മംമ്ത മോഹൻദാസ്. ആഡംബര വാഹനമായ പോർഷെയാണ് താരം സ്വന്തമാക്കിയത്. സോഷ്യൽ മീഡിയയിലൂടെ താരം തന്നെയാണ് ഇഷ്ടവാഹനം നേടിയ സന്തോഷം പങ്കുവെച്ചത്. 

ഒരു സ്വപ്നം യാഥാർത്ഥ്യമായി. ഒരു പതിറ്റാണ്ടാണ് ഞാൻ നിനക്കായി കാത്തിരുന്നത്. എന്റെ കുടുംബത്തിലെ പുതിയ കുഞ്ഞിനെ അഭിമാനത്തോടെ നിങ്ങൾക്കുമുന്നിൽ അവതരിപ്പിക്കുകയാണ്. - മംമ്ത കുറിച്ചു. പോർഷെയുടെ സ്പോർട്സ് കാർ 911 കരേര എസ് ആണ് താരത്തിന്റെ പുതിയ കാർ. കൊച്ചിയിലെ ഡീലർഷിപ്പിൽ നിന്നാണ് 1.84 കോടി രൂപ എക്സ് ഷോറൂം വില വരുന്ന മഞ്ഞ നിറത്തിലുള്ള കരേര മംമ്ത തന്റെ ഗാരിജിലെത്തിച്ചത്. 

പോർഷെയുടെ ഏറ്റവും മികച്ച കാറുകളിലൊന്നാണ് 911 കരേര എസ്. മൂന്നു ലീറ്റർ ആറു സിലിണ്ടർ പെട്രോൾ എൻജിൻ ഉപയോഗിക്കുന്ന കാറിന് 450 പിഎസ് കരുത്തും 530 എൻഎം ടോർക്കുമുണ്ട്. പൂജ്യത്തിൽനിന്ന് 100 കിലോമീറ്റർ വേഗം കൈവരിക്കാൻ ഈ കാറിന് 3.7 സെക്കൻഡ് മാത്രം മതി. ഉയർന്ന വേഗം 308 കിലോമീറ്റർ.