'ഞാന്‍ മലയാളിയാണ്, ഇത്ര ആഘോഷിക്കാന്‍ മാത്രം അതിലെന്താണ് ഉള്ളത്': മഞ്ഞുമ്മൽ ബോയ്സിനെതിരെ നടി; വിഡിയോ

തമിഴ്നാട്ടിൽ വമ്പൻ വിജയം നേടുകയാണ് മഞ്ഞുമ്മൽ ബോയ്സ്. മികച്ച അഭിപ്രായമാണ് ചിത്രത്തേക്കുറിച്ച് പുറത്തുവരുന്നത്. ഇപ്പോൾ മഞ്ഞുമ്മൽ ബോയ്സിനെ വിമർശിച്ചുകൊണ്ട് രം​ഗത്തെത്തിയിരിക്കുകയാണ് ഒരു മലയാളി നടി. ഇത്ര ആഘോഷിക്കാനും മാത്രം ചിത്രത്തിൽ എന്താണ് ഉള്ളത് എന്നാണ് മേഘന എല്ലെൻ ചോദിക്കുന്നത്. കേരളത്തിൽ ചിത്രം വലിയ ശ്രദ്ധനേടിയില്ല എന്നാണ് ഇവർ പറയുന്നത്. കൂടാതെ കേരളത്തിൽ വിജയ് സിനിമകൾ മാത്രമാണ് വിജയിക്കുന്നത് എന്നും മേഘന പറഞ്ഞു.

മേഘന നായികയായി എത്തിയ അരിമാപ്പട്ടി ശക്തിവേൽ എന്ന ചിത്രം കഴിഞ്ഞ ദിവസം റിലീസ് ചെയ്തിരുന്നു. ഈ സിനിമ കണ്ടിറങ്ങിയതിന് പിന്നാലെയായിരുന്നു ഇവരുടെ പ്രതികരണം. ഞാനൊരു മലയാളിയാണ്. കേരളത്തിൽ മഞ്ഞുമ്മൽ ബോയ്സിന് ഇത്രത്തോളം പ്രതികരണം ഒന്നുമില്ല. എന്തുകൊണ്ട് തമിഴ്നാട്ടിൽ ഇങ്ങനെ ഈ സിനിമ ആഘോഷിക്കുന്നതെന്ന് മനസിലാകുന്നില്ല. വ്യത്യസ്തമായി എന്തെങ്കിലും കൊടുത്തോ എന്നും അറിയില്ല. ഞാൻ സിനിമ കണ്ട ആളാണ്. എനിക്ക് അത്ര മികച്ചതായി തോന്നിയില്ല.- എന്നാണ് മേഘന പറഞ്ഞത്.

എന്നാൽ അടുത്തുനിന്നിരുന്ന സംവിധായകൻ ഇതിനെ എതിർത്തു. മഞ്ഞുമ്മൽ ബോയ്സിൽ ഇമോഷൻസ് കണക്ട് ആകുന്നുണ്ടെന്നാണ് അദ്ദേഹം പറഞ്ഞത്. മേഘന വീണ്ടും ചിത്രത്തെ വിമർശിക്കുകയായിരുന്നു. ഇവിടെ മലയാള സിനിമകൾ വലിയ ആഘോഷമാക്കുന്നതുപോലെ കേരളത്തിൽ ആരും തമിഴ് പടങ്ങൾ ആഘോഷമാക്കുന്നില്ല.കേരളത്തിൽ ആകെ ഹിറ്റാകുന്നത് വിജയ് സിനിമകള്‍ മാത്രമാണ്. മറ്റൊരു തമിഴ് സിനിമയും അവിടെ കാണാൻ പോലും കിട്ടില്ല. എനിക്കു തന്നെ ഒരു തമിഴ് സിനിമ കാണണമെന്നുണ്ടെങ്കിൽ കേരളത്തിൽ നിന്നും കൊയമ്പത്തൂരു വന്നാകും കാണുക. അവർ തമിഴ് സിനിമകളെ അധികം പ്രോത്സാഹിപ്പിക്കുന്നില്ല. പിന്നെ എന്തിനാണ് ഇവിടെ ഇവർ മലയാള സിനിമകളെ ഇത്ര പ്രോത്സാഹിപ്പിക്കുന്നതെന്ന് എനിക്ക് അറിയില്ല- നടി പറഞ്ഞു.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

മേഘനയുടെ വാക്കുകൾ വലിയ രീതിയിൽ ചർച്ചയാവുകയാണ്. നിരവധി പേരാണ് താരത്തെ വിമർശിച്ചുകൊണ്ട് രം​ഗത്തെത്തുന്നത്. മഞ്ഞുമ്മൽ ബോയ്സ് എന്ന് പറയാൻ പോലും അറിയാത്ത ഇവർ എങ്ങനെയാണ് മലയാളിയാവുന്നത് എന്നാണ് പലരും ചോദിക്കുന്നത്. കൂടാതെ കേരളത്തിൽ നിന്ന് പണം വാരിയ തമിഴ് ചിത്രങ്ങളേക്കുറിച്ചും ഇവരെ പഠിപ്പിക്കുന്നവരുമുണ്ട്.