'ആ സങ്കടം മാറി', പ്രിയദർശൻ ചിത്രത്തിൽ ആദ്യമായി അഭിനയിച്ച് മഞ്ജു വാര്യർ; ആകാംക്ഷയിലെന്ന് താരം 

എല്ലാവരേയും അമ്പരപ്പിക്കുന്ന ചിത്രം തന്നെയായിരിക്കും മരക്കാർ അറബിക്കടലിന്റെ സിംഹമെന്ന് മഞ്ജു വാര്യർ. മോഹൻലാലും പ്രിയദർശനും ഒരിടവേളയ്ക്ക് ശേഷം ഒരുമിക്കുന്ന ചിത്രത്തിൽ മഞ്ജുവും ഒരു പ്രധാന വേഷത്തിലെത്തുന്നുണ്ട്. പ്രിയദർശനും മഞ്ജുവും ആദ്യമായി ഒരുമിക്കുന്ന ചിത്രമെന്ന പ്രത്യേകതയും സിനിമയ്ക്കുണ്ട്. 

"എന്റെയൊക്കെ കുട്ടിക്കാലം ഒരുപാട് കളർഫുളുമാക്കിയ നിരവധി സിനിമകളാണ് മോഹൻലാൽ-പ്രിയദർശൻ കൂട്ടുകെട്ട് സമ്മാനിച്ചത്. ചിത്രം, കിലുക്കം തുടങ്ങിയ കോമഡി സിനിമകളാണെങ്കിലും കാലാപാനി പോലുള്ള ഗൗരവമാർന്ന ചിത്രങ്ങളാണെങ്കിലും ഒരേ പോലെ എടുത്ത് ഫലിപ്പിച്ച് അത്രയും ഇംപാക്റ്റോടെ നമുക്ക് സമ്മാനിച്ച കൂട്ടുകെട്ടാണ് മോഹൻലാൽ-പ്രിയദർശന്റേത്". അക്ഷരാർത്ഥത്തിൽ ബ്രഹ്‌മാണ്ഡമായ സിനിമയിൽ, ഹിസ്റ്റോറിക്കായിട്ടുള്ള, എപ്പിക്കായിട്ടുള്ള കോമ്പിനേഷിൽ ഒരുങ്ങുന്ന ഈ ചിത്രത്തിന്റെ ഭാഗമാവാൻ കഴിഞ്ഞതിൽ ഒരുപാട് സന്തോഷമുണ്ടെന്നാണ് മഞ്ജുവിന്റെ വാക്കുകൾ. 

വർഷങ്ങൾക്ക് മുൻപ് പ്രിയദർശൻ ചിത്രത്തിൽ അഭിനയിക്കാൻ അവസരമുണ്ടായെങ്കിലും അത് നടക്കാതെപോയെന്നും ആ സങ്കടം വർഷങ്ങൾക്ക് ശേഷം കുഞ്ഞാലി മരക്കാറിലൂടെയാണ് മാറിയ‌തെന്നും മഞ്ജു അഭിമുഖത്തിൽ പറഞ്ഞു. "ഞാൻ അഭിനയിച്ചുകൊണ്ടിരുന്നപ്പോൾ ചന്ദ്രലേഖ എന്ന സിനിമയിൽ ഒന്നിച്ച് പ്രവർത്തിക്കാനുള്ള ഭാഗ്യം വന്നെങ്കിലും എനിക്കത് ചെയ്യാനായില്ല. അതിന്റെ സങ്കടം ഇന്നുമുണ്ട്. ആ സങ്കടം ഒരുപാട് വർഷങ്ങൾക്ക് ശേഷം മാറി. അതിനുള്ള അവസരം വന്നത് കുഞ്ഞാലി മരക്കാറിലൂടെയാണ്", മഞ്ജു പറഞ്ഞു. വളരെ പ്രധാന്യമുള്ള കഥാപാത്രത്തെയാണ് സിനിമയിൽ തനിക്ക് ലഭിച്ചതെന്നും ആരാധകരെ പോലെ ഏറെ ആകാംക്ഷയോടെ സിനിമയുടെ റിലീസിനായി കാത്തിരിക്കുകയാണെന്നും മഞ്ജു കൂട്ടിച്ചേർത്തു.