'റിയൽ ഫാൻബോയ് മൊമന്റ്'; എആർ റഹ്മാനോട് നന്ദി പറഞ്ഞ് സുഷിൻ ശ്യാം

ഒട്ടേറെ ആരാധകരുള്ള മലയാളികളുടെ പ്രിയപ്പെട്ട സം​ഗീത സംവിധായകൻ ആണ് സുഷിൻ ശ്യാം. ഇപ്പോഴിതാ തന്റെ ജീവിതത്തിലെ ഏറ്റവും സന്തോഷകരമായ ഒരു നിമിഷം ആരാധകരുമായി പങ്കുവച്ചിരിക്കുകയാണ് സുഷിൻ. എ ആർ റഹ്മാൻ ഇൻസ്റ്റ​ഗ്രാമിൽ തന്നെ ഫോളോ ചെയ്യുന്നുണ്ടെന്നാണ് സുഷിൻ പങ്കുവച്ചിരിക്കുന്നത്. ഇൻസ്റ്റ​ഗ്രാമിൽ മാത്രം എട്ട് മില്യണിലേറെ ഫോളോവർമാരുള്ള വ്യക്തിത്വമാണ് എആർ റഹ്മാൻ.

സുഷിൻ ശ്യാമിനാകട്ടെ അഞ്ച് ലക്ഷത്തിലേറെയും. എആർ റഹ്മാൻ തന്നെ ഫോളോ ചെയ്യാനാരംഭിച്ച വിവരം ഒരു സ്ക്രീൻഷോട്ട് പങ്കുവെച്ചുകൊണ്ടാണ് സുഷിൻ ശ്യാം അറിയിച്ചത്. 'ശരിക്കും ഇതെന്റെ ആദ്യത്തെ ഫാൻ ബോയ് മൊമെന്റ് ആണ്. നിങ്ങളുടെ സന്ദേശത്തിന് നന്ദിയുണ്ട്' എന്നാണ് ചിത്രം ഇൻസ്റ്റ​ഗ്രാമിൽ സ്റ്റോറിയായി പോസ്റ്റ് ചെയ്തു കൊണ്ട് സുഷിൻ ശ്യാം കുറിച്ചത്.

‘കുമ്പളങ്ങി നൈറ്റ്സ്’, ‘ട്രാൻസ്’, ‘മിന്നൽ മുരളി’, ‘ഭീഷ്മപർവം’, ‘മഞ്ഞുമ്മൽ ബോയ്സ്’ തുടങ്ങി നിരവധി സിനിമകളിലെ പാട്ടുകളാണ് സുഷിന്റെ ഹിറ്റ് ലിസ്റ്റിലുള്ളത്. സിനിമകളിലെ പാട്ടുകൾക്കൊപ്പം തന്നെ സുഷിന്‍ ചെയ്ത പശ്ചാത്തല സംഗീതവും ശ്രദ്ധിക്കപ്പെട്ടിട്ടുണ്ട്. അമൽ നീരദ് സംവിധാനം ചെയ്ത ബോഗെയ്ൻവില്ലയാണ് സുഷിൻ ഒടുവിൽ സം​ഗീതസംവിധാനം നിർവഹിച്ച മലയാള ചിത്രം.

ചിദംബരം സംവിധാനം ചെയ്യുന്ന ബാലൻ ആണ് സുഷിന്റേതായി വരുന്ന പുതിയ ചിത്രം. 'റേ' എന്ന ആൽബത്തിലൂടെ ഇൻഡി മ്യൂസിക്കിലേക്കും സുഷിൻ അടുത്തിടെ രം​ഗപ്രവേശം ചെയ്തിരുന്നു.

ഡൗൺട്രോഡൻസ് എന്ന സ്വന്തം ബാൻഡിനൊപ്പം സംഗീത പരിപാടികളിലും സുഷിൻ സജീവമാണ്. രാമായണ ആണ് എആർ റഹ്മാന്റേതായി ഇനി വരാനുള്ള ബി​ഗ് പ്രൊജക്ട്. വിഖ്യാത ഹോളിവുഡ് സം​ഗീതജ്ഞൻ ഹാൻസ് സിമ്മറുമൊത്താണ് രാമായണയിലെ ​ഗാനങ്ങൾ റഹ്മാൻ ഒരുക്കുന്നത്.