എന്റെ ഏറ്റവും പുതിയ ആരാധനാപാത്രം, ഫഹദിനെ കണ്ട സന്തോഷത്തിൽ കന്നഡ താരം

മികച്ച പ്രകടനത്തിലൂടെ മലയാള സിനിമയുടെ അഭിമാനമാകുന്ന താരമാണ് ഫഹദ് ഫാസിൽ. താരത്തിന്റെ അഭിനയത്തെ പുകഴ്ത്തി നിരവധി പേർ രം​ഗത്തെത്തിയിട്ടുണ്ട്. ഇപ്പോൾ ഫഹദിനോടുള്ള ആരാധന തുറന്നു പറഞ്ഞിരിക്കുകയാണ് കന്നഡ നടനും സം​ഗീതജ്ഞനുമായ വാസുകി വൈഭവ്. 

ഫഹദിനെ നേരിട്ട് കാണാൻ സാധിച്ചതിന്റെ സന്തോഷം പങ്കുവെച്ചുകൊണ്ടാണ് വൈഭവിന്റെ കുറിപ്പ്. ഇൻസ്റ്റാ​ഗ്രാമിൽ താരത്തിനൊപ്പമുള്ള ചിത്രവും പങ്കുവെച്ചിട്ടുണ്ട്.  'എന്റെ ഏറ്റവും പുതിയ ആരാധനാപാത്രത്തിനോടൊപ്പം കുറച്ച് സമയം ചെലവഴിക്കാൻ സാധിച്ചു. ലാളിത്യവും ദയയുമുള്ള ഒരു മനുഷ്യൻ. വളരെ പെട്ടെന്ന് തന്നെ നിങ്ങളുമായി പ്രവർത്തിക്കാൻ കാത്തിരിക്കുന്നു.' വൈഭവ് കുറിച്ചു. തന്റെ ആ​ഗ്രഹം സാധിച്ചു തന്നതിന് നടനും സംവിധായകനുമായ പന്ന​ഗ ഭരനയോട് നന്ദിപറയാനും താരം മറന്നില്ല. 

ഇപ്പോൾ ബാം​ഗളൂരുവിലാണ് ഫഹദും നസ്രിയയും. കഴിഞ്ഞ ദിവസം നടി മേഘ്ന രാജിനെയും കുഞ്ഞിനേയും ഇരുവരും ആശുപത്രിയിൽ എത്തി സന്ദർശിച്ചിരുന്നു. മലയാളത്തിൽ മാത്രമല്ല തമിഴ് സിനിമയിലും ഫഹദ് അഭിനയിച്ചിട്ടുണ്ട്. കന്നഡ നടൻ സം​ഗീത സംവിധായകൻ എന്നീ നിലകളിൽ ശ്രദ്ധേയനാണ് വാസുകി വൈഭവ്. കൂടാതെ കന്നഡ ബി​ഗ് ബോസിൽ മത്സരാർത്ഥിയായി എത്തിയിരുന്നു.