വായടക്കപ്പെട്ടോരുടെ വാക്കാണ് കലാപം, തൊഴിലാളിദിനത്തിൽ ചുവപ്പു നിറച്ച് തുറമുഖം പോസ്റ്റർ

നിവിൻ പോളിയെ നായകനാക്കി രാജീവ് രവി സംവിധാനം ചെയ്ത തുറമുഖത്തിന്റെ പോസ്റ്റർ പുറത്ത്. തൊഴിലാളി ദിനാശംസകൾ നേർന്നുകൊണ്ടുള്ള പോസ്റ്ററിൽ ചിത്രത്തിലെ പ്രധാന താരങ്ങളെല്ലാമുണ്ട്. ശക്തമായ തലവാചകത്തോടൊപ്പമാണ് പോസ്റ്റർ എത്തുന്നത്. 

ചുവപ്പു കൊടി നിറഞ്ഞ പോസ്റ്ററിൽ വായടക്കപ്പെട്ടോരുടെ വാക്കാണ് കലാപം എന്നാണ് കുറിച്ചിരിക്കുന്നത്. നിവിന്‍ പോളി, ജോജു, പൂര്‍ണിമ ഇന്ദ്രജിത്ത്, ഇന്ദ്രജിത്ത്, നിമിഷ സജയൻ തുടങ്ങിയവർ അവതരിപ്പിക്കുന്ന കഥാപാത്രങ്ങളാണ് പോസ്റ്ററിൽ ഉള്ളത്. ആയിരത്തി തൊള്ളായിരത്തി അന്‍പതുകളില്‍ കൊച്ചി തുറമുഖത്ത് നിലനിന്നിരുന്ന ചാപ്പ സമ്പ്രദായത്തിനെതിരെ നടന്ന തൊഴിലാളി മുന്നേറ്റത്തെക്കുറിച്ചുള്ള ചിത്രമാണിത്. കടലും കരയും മനുഷ്യരും കെട്ടുപിണഞ്ഞു കിടക്കുന്ന കഥാന്തരീക്ഷത്തില്‍ മൂന്ന് കാലഘട്ടങ്ങളുടെ ജീവിതമാണ് തുറമുഖത്തിൽ പറയുന്നത്. 

വിഖ്യാതമായ റോട്ടര്‍ഡാം ഇന്റര്‍നാഷനല്‍ ഫിലിം ഫെസ്റ്റിവലില്‍ സിനിമയുടെ വേള്‍ഡ് പ്രിമിയര്‍ നടന്നിരുന്നു. ബിഗ് സ്‌ക്രീന്‍ മത്സരവിഭാഗത്തിലാണ് തുറമുഖം പ്രദര്‍ശിപ്പിച്ചത്. കെ എം ചിദംബരം രചിച്ച നാടകത്തിന് തിരക്കഥാരൂപം സൃഷ്ടിച്ചത് മകന്‍ ഗോപന്‍ ചിദംബരമാണ്. മൂത്തോന് ശേഷം നിവിന്‍ പോളി എന്ന നടന്റെ മികച്ച പ്രകടനം പ്രതീക്ഷിക്കാവുന്ന സിനിമയായിരിക്കും തുറമുഖം എന്നാണ് വിലയിരുത്തലുകൾ.