ഫഹദ് ഫാസിലും കല്യാണി പ്രിയദര്‍ശനും പ്രധാന വേഷങ്ങളിലെത്തുന്ന ചിത്രം 'ഓടും കുതിര ചാടും കുതിര'യുടെ ടീസര്‍ പുറത്തു വിട്ടു. അല്‍ത്താഫ് സലീം സംവിധാനം ചെയ്യുന്ന ചിത്രം മുഴുനീള എന്റര്‍ടെയ്‌നര്‍ ആയിരിക്കുമെന്ന് ഉറപ്പു നല്‍കുന്നതാണ് ട്രെയ്‌ലര്‍. ഫഹദും കല്യാണിയും കരിയറില്‍ ആദ്യമായി ഒരുമിക്കുന്ന സിനിമയിലെന്ന നിലയിലും ഞണ്ടുകളുടെ നാട്ടിലൊരു ഇടവേളയ്ക്ക് ശേഷം അല്‍ത്താഫ് ഒരുക്കുന്ന സിനിമ എന്ന നിലയിലും പ്രേക്ഷകര്‍ പ്രതീക്ഷയോടെ കാത്തിരിക്കുന്ന സിനിമയാണ് ഓടും കുതിര ചാടും കുതിര.
ഫഹദും കല്യാണിയും അവതരിപ്പിക്കുന്ന കഥാപാത്രങ്ങളുടെ വിവാഹത്തെ ചുറ്റിപ്പറ്റി കഥ പറയുന്ന സിനിമ റൊമാന്‍സും കോമഡിയുമെല്ലാം നിറഞ്ഞ ഫെസ്റ്റിവല്‍ ചിത്രമായിരിക്കുമെന്നാണ് ട്രെയ്‌ലര്‍ നല്‍കുന്ന സൂചന. ഒരിടവേളയ്ക്ക് ശേഷമാണ് ഫഹദ് മുഴുനീള കോമഡി വേഷം ചെയ്യുന്നത്. ഓണം റിലീസായി ഓഗസ്റ്റ് 29 നാണ് സിനിമ തിയേറ്ററുകളിലേക്ക് എത്തുക.
ഫഹദിനും കല്യാണിയ്ക്കും പുറമെ ധ്യാന്‍ ശ്രീനിവാസന്‍, ലാല്‍, വിനയ് ഫോര്‍ട്ട്, രേവതി പിള്ള, രഞ്ജി പണിക്കര്‍, സുരേഷ് കൃഷ്ണ, നന്ദു, അനുരാജ്, ഇടവേള ബാബു, ബാബു ആന്റണി, വിനീത് ചാക്യാര്‍, സാഫ് ബോയ്, ലക്ഷ്മി ഗോപാലസ്വാമി, ആതിര നിരഞ്ജന തുടങ്ങി വലിയൊരു താരനിര തന്നെ ചിത്രത്തില്‍ അണിനിരക്കുന്നുണ്ട്. ആഷിഖ് ഉസ്മാന്‍ ആണ് സിനിമയുടെ നിര്‍മാണം. ജിന്റോ ജോര്‍ജ് ആണ് ഛായാഗ്രഹണം. ജസ്റ്റിന്‍ വര്‍ഗീസ് ആണ് സംഗീതം. എഡിറ്റിംഗ് നിര്‍വഹിച്ചിരിക്കുന്നത് അഭിനവ് സുന്ദര്‍ നായിക് ആണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
