പാർവതിയുടേയും സംഘത്തിന്റേയും ഉത്തരാഖണ്ഡ് യാത്ര; 'വർത്തമാന'ത്തിലെ ആദ്യ ​ഗാനം പുറത്തിറങ്ങി

പാർവതി തിരുവോത്തിനെ നായികയാക്കി സിദ്ധാർഥ ശിവ സംവിധാനം ചെയ്യുന്ന 'വർത്തമാന'ത്തിലെ ആദ്യ ഗാനം പുറത്തിറങ്ങി. മലയാളത്തിലും ഹിന്ദിയിലുമായി വരികളുള്ള 'സിന്ദഗി' എന്ന ഗാനത്തിൻറെ വീഡിയോയാണ് പുറത്തുവിട്ടിരിക്കുന്നത്. വിശാൽ ജോൺസണിൻറെ വരികൾക്ക് ഹിഷാം അബ്‍ദുൾ വഹാബാണ് സം​ഗീതം. ഒരു വിവാഹത്തിൽ പങ്കെടുക്കാനായി ഉത്തരാഖണ്ഡിലെത്തുന്ന പ്രധാന കഥാപാത്രങ്ങളെയാണ് ഗാനത്തിൽ ദൃശ്യവത്കരിച്ചിരിക്കുന്നത്.

ഡൽഹിയിലെ ഒരു സർവകലാശാലയിലേക്ക് മലബാറിൽ നിന്നെത്തുന്ന ഗവേഷക വിദ്യാർഥിയാണ് പാർവതിയുടെ കഥാപാത്രം. സ്വാതന്ത്ര്യ സമര സേനാനി മുഹമ്മദ് അബ്ദുൽ റഹ്മാൻറെ ജീവിതമാണ് അവരുടെ ഗവേഷണ വിഷയം. ഫൈസാ സൂഫിയ എന്ന കഥാപാത്രം നേരിടുന്ന വെല്ലുവിളികളും പ്രതിസന്ധികളുമാണ് ചിത്രത്തിൻറെ പ്രമേയം. 

ആര്യാടൻ ഷൗക്കത്ത് തിരക്കഥയെഴുതിയ ചിത്രത്തിൽ ജെഎൻയു കശ്മീർ വിഷയങ്ങളെ കുറിച്ച് സൂചിപ്പിക്കുന്നുണ്ട്. കേരളത്തിൽ നിന്ന് ഡൽഹിയിലേക്ക് പഠനത്തിനെത്തുന്ന പെൺകുട്ടിയുടെ കഥാപാത്രത്തെയാണ് പാർവതി ഇതിൽ അവതരിപ്പിച്ചിരിക്കുന്നത്. റോഷൻ മാത്യു, സിദ്ദിഖ്, നിർമൽ പാലാഴി എന്നിവരും ചിത്രത്തിൽ പ്രധാന വേഷങ്ങൾ അവതരിപ്പിച്ചിട്ടുണ്ട്.