'എന്റെ ബെസ്റ്റ് ഫ്രണ്ടിനൊപ്പമുള്ള 23 വർഷങ്ങൾ'; വിവാഹ വാർഷികം ആഘോഷമാക്കി പൂർണിമയും ഇന്ദ്രജിത്തും

മലയാളികളുടെ പ്രിയപ്പെട്ട താരദമ്പതിമാരാണ് ഇന്ദ്രജിത്തും പൂർണിമയും. തങ്ങളുടെ സിനിമാ കാര്യങ്ങളും വ്യക്തിപരമായ വിശേഷങ്ങളുമൊക്കെ ഇരുവരും സോഷ്യൽ മീഡിയയിലൂടെ ആരാധകരുമായി പങ്കുവയ്ക്കാറുണ്ട്. മക്കളുടെ വിശേഷങ്ങളും രസകരമായ റീലുകളുമൊക്കെ പൂർണിമയും പലപ്പോഴായി പങ്കുവയ്ക്കാറുണ്ട്.

ഇപ്പോഴിതാ വിവാഹവാർഷിക വിശേഷം പങ്കുവച്ചിരിക്കുകയാണ് പൂർണിമ. 23 -ാം വിവാഹ വാർഷികമാണ് ഇരുവരും ആഘോഷിച്ചത്. "അനന്തമായ സ്നേഹത്തിനും ഊഷ്മളമായ ആശംസകൾക്കും നന്ദി. എന്നേക്കും നന്ദി".- എന്നാണ് പൂർണിമ ഇന്ദ്രജിത്തിനൊപ്പമുള്ള ചിത്രങ്ങൾ പങ്കുവച്ച് കുറിച്ചത്.

എന്റെ ബെസ്റ്റ്ഫ്രണ്ടിനൊപ്പമുള്ള 23 വർഷങ്ങൾ എന്നും പൂർണിമ കുറിച്ചിട്ടുണ്ട്. നിരവധി പേരാണ് താരദമ്പതികൾക്ക് ആശംസകൾ നേരുന്നത്. ഞങ്ങളുടെ പവർ കപ്പിൾ, ചേട്ടനും ചേച്ചിക്കും വിവാഹവാർഷിക ആശംസകൾ എന്നൊക്കെയാണ് പോസ്റ്റിന് താഴെ നിറയുന്ന കമന്റുകൾ.

അതേസമയം ബൾട്ടിയാണ് പൂർണിമയുടേതായി ഒടുവിൽ തിയറ്ററുകളിലെത്തിയ ചിത്രം. ചിത്രത്തിലെ പൂർണിമയുടെ കഥാപാത്രത്തിന് ഏറെ പ്രശംസയും ലഭിച്ചിരുന്നു. ധീരം ആണ് ഇന്ദ്രജിത്തിന്റേതായി പ്രേക്ഷകരിലേക്ക് ഒടുവിലെത്തിയ ചിത്രം.