'ക്ലാസ്‌മേറ്റ്‌സ് സെറ്റില്‍ ഒരുപാട് പ്രണയങ്ങളുണ്ടായിരുന്നു; ഷൂട്ടിംഗ് സമയത്ത് പൊറുതിമുട്ടിച്ചവരുണ്ട്, എന്നും ഇടിയായിരുന്നു'

ലാല്‍ ജോസ് സംവിധാനം ചെയ്ത ചിത്രമാണ് ക്ലാസ്‌മേറ്റ്‌സ്. പൃഥ്വിരാജ്, കാവ്യ മാധവന്‍, ഇന്ദ്രജിത്ത്, ജയസൂര്യ, നരേന്‍ തുടങ്ങിയവര്‍ പ്രധാന വേഷങ്ങളിലെത്തിയ ചിത്രം. 2006 ല്‍ പുറത്തിറങ്ങിയ സിനിമ ആ വര്‍ഷത്തെ ഏറ്റവും വലിയ ഹിറ്റായിരുന്നു. കേരളത്തില്‍ റിയൂണിയനുകള്‍ ട്രെന്റാക്കി മാറ്റിയ ചിത്രമാണ് ക്ലാസ്‌മേറ്റ്‌സ്.

സൗഹൃദവും പ്രണയവുമൊക്കെ ആഘോഷിച്ച സിനിമയുടെ സെറ്റിലും നിരവധി പ്രണയങ്ങളുണ്ടായിരുന്നുവെന്നാണ് പ്രൊഡക്ഷന്‍ മാനേജരായിരുന്ന എല്‍ദോ സെല്‍വരാജ് പറയുന്നത്. മാസ്റ്റര്‍ ബിന്‍ യൂട്യൂബ് ചാനലിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം. ആ വാക്കുകളിലേക്ക്:

ഹിറ്റാകുമെന്ന് നൂറ് ശതമാനം ഉറപ്പായിരുന്നു. തിരക്കഥ വായിച്ചപ്പോള്‍ തന്നെ ഹിറ്റാണെന്ന് ഉറപ്പായിരുന്നു. അന്നത്തെ യുവതാരങ്ങളെല്ലാം ഒരുമിച്ച് വന്ന സിനിമയാണ്. എല്ലാവരുമായി നല്ല സൗഹൃദമുണ്ടായിരുന്നു. ഇപ്പോഴും നല്ല സുഹൃത്തുക്കളാണ്. എന്റെ ആവശ്യങ്ങള്‍ക്കായി ഞാന്‍ അവരെ വിളിക്കാറില്ലെന്ന് മാത്രം. ഇപ്പോഴും കണ്ടാല്‍ സംസാരിക്കും. അതിന് ശേഷമാണ് റിയൂണിയന്‍ ട്രെന്റാകുന്നത്. എനിക്ക് പോലും അന്ന് ടിക്കറ്റ് കിട്ടിയിരുന്നില്ല.

മേക്കപ്പ് അസിസ്റ്റന്റായിരുന്ന ശ്രീജിത്ത് ഗുരുവായൂര്‍, സൗണ്ട് റെക്കോര്‍ഡിസ്റ്റ് സോജി, പൃഥ്വിരാജിന്റെ കൂടെ ഉണ്ടായിരുന്ന ട്രെയ്‌നര്‍, അങ്ങനെ കുറേപ്പേരുടെ പ്രണയം നടന്നത് ആ സെറ്റില്‍ വച്ചാണ്. എന്റെ ഖല്‍ബിലെ എന്ന പാട്ട് വെക്കുമ്പോള്‍ ആ ഹാളില്‍ വേറെ തന്നൊരു ഫീലായിരുന്നു. ആ പാട്ട് വെക്കുമ്പോള്‍ ശ്രീജിത്തും അപ്പുറത്ത് നില്‍ക്കുന്ന പെണ്‍കുട്ടിയുമായൊരു കണ്ണോട് കണ്ണ്. സോജിയും മറ്റേ പെണ്‍കുട്ടിയുമായും, പൃഥ്വിരാജിന്റെ കൂടെയുള്ളയാളും അതില്‍ അഭിനയിക്കാന്‍ വന്ന പെണ്‍കുട്ടിയുമായും പ്രണയത്തിലായി. അവരുടെയൊക്കെ പ്രണയ വിവാഹങ്ങള്‍ നടന്നത് ആ സിനിമ കാരണമാണ്.

സെറ്റില്‍ എന്നും ഇടിയും ബഹളവുമായിരുന്നു. താരങ്ങള്‍ ശ്രദ്ധിക്കാതെ വരുമ്പോള്‍ നാട്ടുകാര്‍ ബഹളം വെക്കുകയും കാറിന് കല്ലുകൊണ്ട് വലിയ്ക്കുകയുമൊക്കെ ചെയ്യുമായിരുന്നു. ഒരു ദിവസം വലിയ പ്രശ്‌നം നടന്നു. ഷോട്ട് വച്ചോണ്ടിരിക്കുമ്പോള്‍ എല്‍ദോ ചേട്ടനെ തല്ലുന്നേയെന്ന് ഉറക്കെ വിളിച്ചു പറഞ്ഞു. ലാല്‍ ജോസെല്ലാം ഓടി വന്നു. ജൂനിയര്‍ ആര്‍ട്ടിസ്റ്റുകളും നാട്ടുകാരും തമ്മിലുള്ള ബഹളത്തില്‍ ഞാന്‍ കോംപ്രമൈസ് ആക്കാന്‍ പോയതായിരുന്നു ഞാന്‍.

ഒരു ദിവസം ഞാന്‍ ഒറ്റപ്പാലത്ത് പോയി തിരികെ വരികയായിരുന്നു. കോട്ടയം റെയില്‍വെ സ്‌റ്റേഷനില്‍ വന്നിറങ്ങി. ഞാന്‍ അന്ന് ഓടിച്ചു വിട്ടവന്‍ അവിടെ നില്‍ക്കുന്നു. എന്റെ ചങ്കൊന്ന് പെടച്ചു. പുലര്‍ച്ചെ രണ്ട് മണിയായി. ഞാന്‍ പഴയ വിദ്യാര്‍ത്ഥി നേതാവായി, എന്താടാ ഇവിടെ എന്ന് ചോദിച്ചു. ഒന്നുമില്ല ചേട്ടാ എന്നും പറഞ്ഞ് അവന്‍ പോയി. താരങ്ങളെ കാണണം എന്ന ആഗ്രഹവുമായി വരുന്ന ആരാധകരാണ്. എല്ലാവരും വന്ന് കണ്ടു പോകും. പക്ഷെ ചിലര്‍ പ്രശ്‌നമുണ്ടാക്കും.