'എനിക്ക് പറയാൻ വാക്കുകളില്ല'; രാമായണ ഷൂട്ടിങ് ലൊക്കേഷനിൽ വികാരാധീനനായി രൺബീർ

ബോളിവുഡ് സിനിമാ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് രാമായണ. രൺബീർ കപൂർ ആണ് ചിത്രത്തിൽ രാമനായി എത്തുന്നത്. നിതേഷ് തിവാരി സംവിധാനം ചെയ്യുന്ന ചിത്രത്തിന്റെ ചിത്രീകരണം അവസാനിച്ചിരിക്കുകയാണ്. ഷൂട്ടിങ്ങിന്റെ അവസാന ദിവസം വികാരാധീനനായി സംസാരിക്കുന്ന രൺബീറിന്റെ വിഡിയോയാണിപ്പോൾ ശ്രദ്ധേയമാകുന്നത്.

"ശ്രീരാമന്റെ വേഷം എന്റെ ജീവിതത്തിലെ ഏറ്റവും പ്രധാനപ്പെട്ട കഥാപാത്രമാണ്. ഇത്ര വലിയൊരു പ്രൊജക്ടിന്റെ ഭാഗമാകാൻ കഴിഞ്ഞത് എനിക്കൊരു ബഹുമതിയാണ്. ഈ യാത്രയുടെ അവസാനം, വാക്കുകളിൽ പ്രകടിപ്പിക്കാൻ പ്രയാസമാണ് ”- രൺബീർ പറഞ്ഞു.

സായ് പല്ലവി (സീത), യഷ് (രാവണൻ), സണ്ണി ഡിയോൾ (ഹനുമാൻ), രവി ദുബേ (ലക്ഷ്മണൻ), ലാറ ദത്ത (കൈകേയി), കാജൽ അഗർവാൾ (മണ്ഡോദരി), രാകുൽ പ്രീത് സിങ് (ശൂർപ്പണക) എന്നിവർ ഉൾപ്പെടുന്ന വൻ താരനിരയാണ് ചിത്രത്തിനായി അണിനിരക്കുന്നത്.

രണ്ട് ഭാ​ഗങ്ങളായാണ് ചിത്രം പ്രേക്ഷകരിലേക്കെത്തുക. ആദ്യ ഭാഗം 2026 ദീപാവലിക്കും, രണ്ടാം ഭാഗം 2027 ദീപാവലിക്കും റിലീസ് ചെയ്യും. ഈ മാസം മൂന്നിന് ചിത്രത്തിന്റെ ലുക്ക് പോസ്റ്റർ പുറത്തുവരുമെന്നും റിപ്പോർട്ടുകൾ പ്രചരിക്കുന്നുണ്ട്.