അഭിനയം അവസാനിപ്പിക്കാൻ രൺബീർ? നടനായുള്ള അവസാന ദശകം; ഇനി സംവിധാനം

ബോളിവുഡിൽ നടനെന്ന നിലയിൽ തിളങ്ങിനിൽക്കുമ്പോഴും സംവിധായകനാകാനുള്ള ആഗ്രഹവുമായി രൺബീർ കപൂർ. അടുത്ത രണ്ടോ മൂന്നോ വർഷത്തിനുള്ളിൽ ആദ്യ ചിത്രം സംവിധാനം ചെയ്യാനാണ് താരത്തിന്റെ പദ്ധതി.

ഇതിനായുള്ള തിരക്കഥാ രചനയും ആരംഭിച്ചുകഴിഞ്ഞു. നിതേഷ് തിവാരിയുടെ ‘രാമായണ’ സിനിമയുടെ പ്രമോഷനുമായി ബന്ധപ്പെട്ട് സായ് പല്ലവിക്കൊപ്പം ബിബിസി ഏഷ്യൻ നെറ്റ്‌വർക്കിന് നൽകിയ അഭിമുഖത്തിലാണ് രൺബീർ തന്റെ ആഗ്രഹം വെളിപ്പെടുത്തിയത്.

കുറച്ചുമാസങ്ങൾക്ക് മുമ്പാണ് ആദ്യ സംവിധാന സംരംഭത്തിനായുള്ള തിരക്കഥ എഴുതിത്തുടങ്ങിയത്. ഒരു കഥ സൃഷ്ടിക്കുക എന്നത് വിചാരിച്ചതിലും പ്രയാസകരമാണെന്നും ഇതോടെ എഴുത്തുകാരോടും സിനിമയുടെ സൃഷ്ടിപ്രക്രിയയിൽ പങ്കാളികളാകുന്നവരോടുമുള്ള ബഹുമാനം വർധിച്ചെന്നും താരം പറഞ്ഞു. ഒരു സംവിധായകന് തന്റെ ആശയം നിരവധി ആളുകളിലൂടെ സിനിമയായി അവതരിപ്പിക്കാൻ കഴിയുന്നതാണ് ഏറ്റവും ആവേശകരമായ കാര്യമെന്നും രൺബീർ കൂട്ടിച്ചേർത്തു.

ആദ്യ ചിത്രത്തിന്റെ ജോണർ ഇതുവരെ തീരുമാനിച്ചിട്ടില്ലെങ്കിലും ഫീൽ ഗുഡ് സിനിമകളോടാണ് താൽപര്യമെന്ന് രൺബീർ വ്യക്തമാക്കി. ‘ലൈഫ് ഈസ് ബ്യൂട്ടിഫുൾ’, ‘ഇറ്റ്സ് എ വണ്ടർഫുൾ ലൈഫ്’, രാജ്കുമാർ ഹിറാനിയുടെ സിനിമകൾ എന്നിവയാണ് തന്റെ ഇഷ്ടചിത്രങ്ങളെന്നും അവയുടെ സ്വഭാവത്തിലുള്ള ഒരു ഫീൽ ഗുഡ് ഫാമിലി ഡ്രാമ ഒരുക്കാനാണ് ആഗ്രഹമെന്നും താരം പറഞ്ഞു.

നിലവിൽ അഭിനയിക്കുന്ന ചിത്രങ്ങളുടെ തിരക്കുകൾക്കിടയിലും തിരക്കഥാ രചനയ്ക്കായി സമയം കണ്ടെത്തുന്നുണ്ട്. വർഷത്തിൽ 100 മുതൽ 125 ദിവസം വരെയാണ് താൻ അഭിനയത്തിനായി മാറ്റിവെക്കുന്നതെന്നും ബാക്കിയുള്ള സമയം കഥകൾ എഴുതാനും മറ്റ് കാര്യങ്ങൾക്കുമായി ഉപയോഗിക്കാനാകുമെന്നും രൺബീർ പറഞ്ഞു.

തന്റെ കരിയറിലെ അടുത്ത ഘട്ടത്തെക്കുറിച്ചും താരം അഭിമുഖത്തിൽ സംസാരിച്ചു. അഭിനയത്തിലെ അവസാന പത്ത് വർഷങ്ങളായിരിക്കും ഇനി വരാനിരിക്കുന്നതെന്ന സൂചന നൽകിയ രൺബീർ, പതിയെ സംവിധാനത്തിലേക്ക് ശ്രദ്ധ കേന്ദ്രീകരിക്കാനാണ് ആഗ്രഹിക്കുന്നതെന്നും വ്യക്തമാക്കി. എന്നാൽ സ്വയം നായകനായി അഭിനയിച്ചുകൊണ്ട് ആദ്യ ചിത്രം സംവിധാനം ചെയ്യാൻ ഉദ്ദേശിക്കുന്നില്ലെന്നും താരം പറഞ്ഞു.

ആദ്യം നിലവിലുള്ള സിനിമാ പ്രതിബദ്ധതകൾ പൂർത്തിയാക്കാനാണ് ലക്ഷ്യം. ‘ബ്രഹ്മാസ്ത്ര 2’, ‘ആനിമൽ പാർക്ക്’, ‘രാമായണ പാർട്ട് 2’ തുടങ്ങിയ ചിത്രങ്ങൾ പൂർത്തിയാക്കിയ ശേഷം സംവിധാന സംരംഭവുമായി മുന്നോട്ടുപോകാനാണ് പദ്ധതിയെന്നും രൺബീർ വെളിപ്പെടുത്തി. ഇതാദ്യമായല്ല രൺബീർ സംവിധാന മോഹം തുറന്നുപറയുന്നത്. 2025ലെ പിറന്നാൾ ദിനത്തിൽ നടത്തിയ ഇൻസ്റ്റഗ്രാം ലൈവിലും സിനിമ സംവിധാനം ചെയ്യാനുള്ള ആഗ്രഹം താരം പങ്കുവെച്ചിരുന്നു. രണ്ട് കഥകളുടെ ആശയങ്ങൾ വികസിപ്പിക്കാനായി റൈറ്റേഴ്സ് റൂം ആരംഭിച്ചതായും അന്ന് പറഞ്ഞിരുന്നു.

സിനിമാ പാരമ്പര്യമുള്ള കുടുംബത്തിൽനിന്നാണ് രൺബീർ എത്തുന്നത്. പിതാവ് ഋഷി കപൂർ സംവിധാനം ചെയ്ത ‘ആ ആബ് ലൗട്ട് ചലേൻ’ എന്ന ചിത്രത്തിൽ കൗമാരകാലത്ത് രൺബീർ സഹായിയായി പ്രവർത്തിച്ചിരുന്നു. സഞ്ജയ് ലീല ബൻസാലിയുടെ ‘ബ്ലാക്ക്’ എന്ന ചിത്രത്തിലും അസിസ്റ്റന്റ് ഡയറക്ടറായി പ്രവർത്തിച്ച അനുഭവമുണ്ട്. മുത്തച്ഛൻ രാജ് കപൂറും ഇന്ത്യൻ സിനിമയിലെ ശ്രദ്ധേയനായ സംവിധായകനായിരുന്നു. അതേസമയം, സഞ്ജയ് ലീല ബൻസാലി സംവിധാനം ചെയ്യുന്ന ‘ലവ് ആൻഡ് വാർ’ ആണ് രൺബീറിന്റെ വരാനിരിക്കുന്ന പ്രധാന ചിത്രങ്ങളിലൊന്ന്. ആലിയ ഭട്ടും വിക്കി കൗശലും ചിത്രത്തിൽ പ്രധാന വേഷങ്ങളിലെത്തുന്നുണ്ട്.