'ഇപ്പോൾ ആഘോഷിച്ചിട്ട് എന്ത് പ്രയോജനം ?'; ആയിരത്തിൽ ഒരുവൻ പരാജയപ്പെട്ടതിനെക്കുറിച്ച് സെൽവരാഘവൻ

നടനായും സംവിധായകനായും തിളങ്ങി നിൽക്കുന്ന വ്യക്തിയാണ് സെൽവരാഘവൻ. ഷെയ്ൻ നി​ഗം നായകനായെത്തിയ ബൾട്ടി എന്ന ചിത്രത്തിലൂടെ മലയാളത്തിലും സെൽവരാഘവൻ അരങ്ങേറ്റം കുറിച്ചു. കാതൽ കൊണ്ടേൻ, പുതുപ്പേട്ടൈ, ആയിരത്തിൽ ഒരുവൻ, മയക്കം എന്ന, ഇരണ്ടാം ഉലകം തുടങ്ങി ഇദ്ദേഹത്തിന്റെ നിരവധി ചിത്രങ്ങൾ പ്രേക്ഷക- നിരൂപക പ്രശംസകൾ ഏറ്റുവാങ്ങിയിട്ടുണ്ട്.

ഇപ്പോഴിതാ ആയിരത്തിൽ ഒരുവൻ എന്ന സിനിമയെക്കുറിച്ച് സംസാരിക്കുകയാണ് സംവിധായകൻ. 2010 ൽ കാർത്തി നായകനായി എത്തിയ സിനിമ ഇപ്പോൾ വീണ്ടും ആരാധകർ ആഘോഷിക്കുന്നുണ്ട്. എന്നാൽ റീലീസ് സമയത്ത് ആഘോഷിക്കാതെ ഇപ്പോൾ ഏറ്റെടുത്താൽ എന്താണ് പ്രയോജനം എന്ന് ചോദിക്കുകയാണ് സെൽവരാഘവൻ.

"ആയിരത്തിൽ ഒരുവൻ എന്ന സിനിമയെക്കുറിച്ച് പ്രേക്ഷകർ മോശം കാര്യങ്ങൾ പറഞ്ഞപ്പോൾ മാത്രമാണ് എനിക്ക് സങ്കടം തോന്നിയത്. ഇന്ന് അവർ ആഘോഷിക്കുകയാണ്, പക്ഷേ ഇപ്പോൾ ആഘോഷിക്കുന്നതിൽ എന്താണ് പ്രയോജനം ?. ധാരാളം പണവും സമയവും നിക്ഷേപിച്ചിട്ടുണ്ട്, റിലീസ് സമയത്ത് തിയറ്ററുകളിൽ അത് ആഘോഷിക്കണം. അവർ ഇപ്പോൾ അത് ആഘോഷിച്ചാലും എനിക്ക് സന്തോഷമില്ല." സെൽവരാഘവൻ പറഞ്ഞു.

ആയിരത്തിൽ ഒരുവൻ രണ്ടാം ഭാഗത്തിന്റെ സ്ക്രിപ്റ്റ് എഴുതിക്കൊണ്ടിരിക്കുകയാണെന്നും കഥയിൽ ഒരു തൃപ്തി വരുന്നത് വരെ എഴുത്ത് തുടരുമെന്നും അദ്ദേഹം പറഞ്ഞിരുന്നു. കാർത്തിയെ കൂടാതെ പാർഥിപൻ, റീമ സെൻ, ആൻഡ്രിയ ജെർമിയ എന്നിവരും ആയിരത്തിൽ ഒരുവനിൽ പ്രധാന വേഷങ്ങളിലെത്തി.

ജി വി പ്രകാശ് കുമാറാണ് ചിത്രത്തിന് സം​ഗീതമൊരുക്കിയത്. അതേസമയം വിഷ്ണു വിശാൽ നായകനായെത്തുന്ന ആര്യൻ ആണ് സെൽവരാ​ഘവന്റേതായി റിലീസിനൊരുങ്ങുന്ന ചിത്രം. ചിത്രത്തിൽ വില്ലനായാണ് സെൽവരാഘവനെത്തുക. ഒരു പക്കാ ത്രില്ലർ ഇൻവസ്റ്റിഗേഷൻ മൂഡിലാണ് ചിത്രം ഒരുങ്ങുന്നത്. ഒക്ടോബർ 31 നാണ് ചിത്രം പുറത്തിറങ്ങുന്നത്. പ്രവീൺ കെ ആണ് സിനിമ തിരക്കഥയെഴുതി സംവിധനം ചെയ്യുന്നത്. ശ്രദ്ധ ശ്രീനാഥ് ആണ് നായിക.