'സ്റ്റിറോയ്ഡ് ഉപയോ​ഗിച്ച് ശിവകാർത്തികേയന്റെ ആരോ​ഗ്യം പോയി'; അമരന്റെ സമയത്ത് വന്ന വ്യാജ വാർത്തകളെക്കുറിച്ച് നടൻ

മദ്രാസിയെന്ന തന്റെ പുതിയ ചിത്രത്തിന്റെ പ്രൊമോഷൻ തിരക്കുകളിലാണിപ്പോൾ നടൻ ശിവകാർത്തികേയൻ. സെപ്റ്റംബർ 5 ന് തിയറ്ററുകളിലെത്തുന്ന ചിത്രം സംവിധാനം ചെയ്യുന്നത് എആർ മുരു​ഗദോസ് ആണ്. ഇപ്പോഴിതാ തനിക്കെതിരെ വന്ന വ്യാജ വാർത്തകളെ കുറിച്ച് ശിവകാർത്തികേയൻ പറഞ്ഞ വാക്കുകളാണ് ശ്രദ്ധ നേടുന്നത്. നിങ്ങളെക്കുറിച്ച് എന്തെങ്കിലും അഭ്യൂഹങ്ങൾ അല്ലെങ്കിൽ വ്യാജ വാർത്തകൾ വന്നത് ശ്രദ്ധയിൽപ്പെട്ടിട്ടുണ്ടോ എന്നായിരുന്നു ശിവകാർത്തികേയനോട് അവതാരക ചോദിച്ചത്.

സ്റ്റിറോയ്ഡ് ഉപയോ​ഗിച്ച് ആരോ​ഗ്യം നഷ്ടപ്പെട്ടു എന്ന തരത്തിലൊക്കെ വാർത്തകൾ വന്നിരുന്നുവെന്ന് പറയുകയാണ് ശിവകാർത്തികേയൻ. "ഒരുപാട് വന്നിട്ടുണ്ട്. അമരന്റെ സമയത്ത് ഞാൻ സിക്സ് പാക്ക് ആക്കിയിരുന്നു. അതിന്റെ ചിത്രമെടുത്ത് ആളുകൾ അത് 8 പാക്ക് ആക്കി. ആ സമയത്ത് ഞാൻ 1 പാക്ക് പോലും ആയിട്ടില്ലായിരുന്നു. ഞാൻ എന്റെ ബോഡി ഫിറ്റാക്കി അത്രയേ ഉണ്ടായിരുന്നുള്ളൂ.

അതുകഴിഞ്ഞപ്പോൾ അവർ എന്റെ മുഖമൊക്കെ വലിച്ചു നീട്ടി വലുതാക്കി. ശിവകാർത്തികേയൻ സ്റ്റിറോയ്ഡ് ഉപയോ​ഗിച്ചു അദ്ദേഹത്തിന്റെ ആരോ​ഗ്യം നഷ്ടപ്പെട്ടു, അദ്ദേഹത്തിന്റെ ലുക്ക് കണ്ടോ എന്ന തരത്തിലൊക്കെ പിന്നീട് തലക്കെട്ടുകൾ വന്നു. അയ്യോ... എന്നാണ് ഇതൊക്കെ കണ്ടപ്പോൾ എനിക്ക് തോന്നിയത്". - ശിവകാർത്തികേയൻ പറഞ്ഞു.

അതേസമയം രുക്മിണി വസന്ത് ആണ് മദ്രാസിയിൽ നായികയായെത്തുന്നത്. നടൻ ബിജു മേനോനും ചിത്രത്തിൽ പ്രധാന വേഷത്തിലെത്തുന്നുണ്ട്. അനിരുദ്ധ് രവിചന്ദർ ആണ് ചിത്രത്തിന് സം​ഗീതമൊരുക്കുന്നത്. ശിവകാർത്തികേയനും സായ് പല്ലവിയും പ്രധാന വേഷത്തിലെത്തിയ അമരൻ വൻ ഹിറ്റായി മാറിയിരുന്നു. 300 കോടിയിലധികം ചിത്രം കളക്ട് ചെയ്യുകയും ചെയ്തിരുന്നു.