ജോഷിയുടെ 'പാപ്പൻ' എത്തി; എബ്രഹാം മാത്യു മാത്തനായി സുരേഷ് ഗോപി 

ജോഷി ഒരുക്കുന്ന പാപ്പനിലെ ലുക്ക് പുറത്തുവിട്ട് സുരേഷ് ​ഗോപി. ഇരുവരും  ഏഴു വർഷത്തിനു ശേഷം വീണ്ടും ഒന്നിക്കുന്ന ചിത്രമാണ് പാപ്പൻ.  എബ്രഹാം മാത്യു മാത്തൻ എന്ന കഥാപാത്രമായാണ് താരം ചിത്രത്തിലെത്തുന്നത്. സുരേഷ് ‌ഗോപിയുടെ 252-ാമത്തെ സിനിമയാണ് ഇത്.

സിനിമയുടെ ചിത്രീകരണം ഇന്നുമുതൽ കാഞ്ഞിരപ്പള്ളിയിൽ നടക്കും. പാല, ഈരാറ്റുപേട്ട, തൊടുപുഴ എന്നിവടങ്ങളാണ് മറ്റ് ലൊക്കേഷനുകൾ. ക്രൈം ത്രില്ലറായി ഒരുക്കുന്ന ചിത്രത്തിൽ പോലീസ് ഓഫിസറുടെ വേഷത്തിലാണ് സുരേഷ് ​ഗോപി എത്തുന്നതെന്നാണ് റിപ്പോർട്ടുകൾ. സുരേഷ് ഗോപിയും ഗോകുൽ സുരേഷും ആദ്യമായി ഒന്നിക്കുന്ന ചിത്രത്തിൽ  സണ്ണിവെയിൻ, നൈല ഉഷ, നീത പിള്ള, ആശ ശരത്, കനിഹ, ചന്ദുനാഥ്‌,വിജയരാഘവൻ, ടിനി ടോം,ഷമ്മി  തിലകൻ തുടങ്ങി വമ്പൻ താര നിരയാണ് അണിനിരക്കുന്നത്.

സൂപ്പർ ഹിറ്റായ പൊറിഞ്ചു മറിയം ജോസിന് ശേഷമുള്ള ജോഷിയുടെ ചിത്രമായ പാപ്പൻ. ലേലം, വാഴുന്നോർ, പത്രം തുടങ്ങി നിരവധി സൂപ്പർഹിറ്റുകൾ സമ്മാനിച്ച ജോഷി-സുരേഷ്ഗോപി കൂട്ടുകെട്ടാണ് പാപ്പനിൽ വീണ്ടും ഒന്നിക്കുന്നത്. ആർജെ ഷാനാണ് ചിത്രത്തിന്റെ തിരക്കഥയൊരുക്കുന്നത്. ഡേവിഡ് കാച്ചപ്പിള്ളിയും ഷരീഫ് മുഹമ്മദും ചേർന്നാണ് നിർമാണം.