'സ്കൂളിലൊക്കെ പോവുന്നുണ്ടോ?, റീല്‍സ് ഉണ്ടാക്കല്‍ മാത്രമാണോ പണി?'; ഹർഷാലിയുടെ മറുപടി ഇതാ

2015ൽ സൽമാൻ ഖാൻ നായകനായി പുറത്തിറങ്ങിയ ബജ്‌രംഗി ഭായ്ജാൻ എന്ന ചിത്രത്തിലെ മുന്നിയെന്ന കഥാപാത്രമായെത്തി ശ്രദ്ധേയായ താരമാണ് ഹർഷാലി മൽഹോത്ര. സാമൂഹിക മാധ്യമങ്ങളിലൂടെ ആരാധകരുമായി നിരന്തരം ഇടപെടുന്ന താരങ്ങളിൽ ഒരാൾ കൂടിയാണ് ഹർഷാലി. ഇപ്പോഴിതാ ഒരു സന്തോഷ വാർത്ത പങ്കുവച്ചിരിക്കുകയാണ് ഈ കുട്ടിത്താരം.

പത്താം ക്ലാസ് പരീക്ഷയിൽ ഉന്നത വിജയം നേടിയ ‌വിവരമാണ് ഹർഷാലി വീഡിയോയിലൂടെ പങ്കുവച്ചിരിക്കുന്നത്. തനിക്കെതിരെ നെ​ഗറ്റീവ് കമന്റുകൾ പറയുന്നവർക്കുള്ള ഹർഷാലിയുടെ കിടിലൻ മറുപടി കൂടിയാണിത്. സിബിഎസ്ഇ പത്താം ക്ലാസ് ബോർഡ് പരീക്ഷയിൽ 83 ശതമാനം മാർക്കാണ് ഹർഷാലി നേടിയത്.

എന്നെ വെറുക്കുന്ന എല്ലാവരോടും ഞാൻ നന്ദി പറയാൻ ആഗ്രഹിക്കുന്നു. കാരണം കഥക് ക്ലാസും ഷൂട്ടിങ്ങും പഠനവുമെല്ലാം ഒരുപോലെ കൊണ്ടുപോകാൻ ‌‌എനിക്ക് കഴിഞ്ഞു. പരീക്ഷയിൽ 83 ശതമാനം മാർക്ക് നേടാനായി. എന്നെ വിശ്വസിക്കുകയും അകമഴിഞ്ഞ് പിന്തുണയ്ക്കുകയും ചെയ്തവരോട് നന്ദിയെന്നാണ് ഹർഷാലി ഇൻസ്റ്റ​ഗ്രാമിൽ കുറിച്ചിരിക്കുന്നത്.

നിങ്ങൾ സ്‌കൂളിൽ പോകാറുണ്ടോ?, ഇത് നിങ്ങളുടെ പത്താം ക്ലാസാണ് പഠിക്കുക, അല്ലെങ്കിൽ തോറ്റുപോകും തുടങ്ങിയ തരത്തിലുള്ള ആളുകളുടെ പരിഹാസ ചോദ്യങ്ങളുടെ സ്ക്രീൻ ഷോട്ടും ഹർഷാലി വീഡിയോയിൽ ഉൾപ്പെടുത്തിയിട്ടുണ്ട്. അതേസമയം ഉന്നത വിജയം നേടിയതിന് താരത്തെ അഭിനന്ദിച്ച് നിരവധി പേരാണ് രം​ഗത്തെത്തിയിരിക്കുന്നത്.

നടി എന്നതിലുപരി കഥക് നർത്തകി കൂടിയാണ് ഹർഷാലി. ഇടയ്ക്ക് തന്റെ ഡാൻസ് വീഡിയോകളും താരം ഇൻസ്റ്റ​ഗ്രാമിലൂടെ പങ്കുവയ്ക്കാറുണ്ട്. കഴിഞ്ഞ ദിവസം സഞ്ജയ് ലീല ബൻസാലിയുടെ ഹീരമണ്ഡി എന്ന വെബ് സീരിസിലെ ഒരു രം​ഗം ഹർഷാലി ഒരു വീഡിയോയിലൂടെ അവതരിപ്പിച്ചിരുന്നു. നിരവധി പേരാണ് ഹർഷാലിയെ പ്രശംസിച്ച് അന്ന് രം​ഗത്തെത്തിയത്.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

കബീർ ഖാൻ സംവിധാനം ചെയ്ത ബജ്‌രംഗി ഭായ്ജാനിലെ ഹർഷാലിയുടെ പ്രകടനം ഒരേസമയം പ്രേക്ഷക ശ്രദ്ധയും നിരൂപക പ്രശംസയും ഏറ്റുവാങ്ങിയിരുന്നു. അഭിനയത്തിന് പുറമേ മോഡലിങ് രം​ഗത്തും സജീവമാണിപ്പോൾ ഹർഷാലി. ഇൻസ്റ്റ​ഗ്രാമിൽ മൂന്ന് മില്യണിലധികം ഫോളോവേഴ്സും താരത്തിനുണ്ട്.