ഇപ്പോഴാണ് ഈ പാട്ടിന്റെയൊക്കെ ബെസ്റ്റ് ടൈം! അണ്ടറേറ്റഡ് മ്യൂസിക് ഡയറക്ടർ, സന്തോഷ് നാരായണന്റെ അഞ്ച് പാട്ടുകൾ

തമിഴകത്ത് മാത്രമല്ല ഇങ്ങ് കേരളത്തിലും ഒട്ടേറെ ആരാധകരുള്ള സം​ഗീത സംവിധായകനാണ് സന്തോഷ് നാരായണൻ. 'സന' (SaNa) എന്നാണ് അദ്ദേഹത്തെ ആരാധകർ സ്നേഹത്തോടെ വിളിക്കുന്നത്. ചുരുങ്ങിയ കാലം കൊണ്ട് തന്നെ തമിഴിലെ മുൻനിര സം​ഗീത സംവിധായകരിൽ ഒരാളായി മാറാൻ സന്തോഷ് നാരായണന് സാധിച്ചു. വ്യത്യസ്തമായ ശൈലി തന്നെയാണ് മറ്റുള്ളവരിൽ നിന്നും സന്തോഷ് നാരായണനെ വേറിട്ടു നിർത്തുന്നത്. 2012 ൽ പാ രഞ്ജിത് സംവിധാനം ചെയ്ത അട്ടക്കത്തിയിലൂടെയാണ് സന്തോഷ് നാരായണൻ സിനിമയിൽ അരങ്ങേറ്റം കുറിക്കുന്നത്.

അതുവരെ തമിഴ് സിനിമാ ലോകത്ത് നിലനിന്നിരുന്ന പാട്ടുകളെ പൊളിച്ചു കൊണ്ടുള്ള വരവായിരുന്നു സന്തോഷ് നാരായണന്റേത്. ഫോക് മ്യൂസിക്കിനൊപ്പം പുത്തിൻ സാങ്കേതിക വിദ്യ ഉപയോ​ഗിച്ചു കൊണ്ടുള്ള പരീക്ഷണമായിരുന്നു സനയുടെ പാട്ടുകളിൽ അധികവും. അട്ടക്കത്തിയിലെ പാട്ടുകൾ ശ്രദ്ധിക്കപ്പെട്ടതോടെ സന്തോഷ് നാരായണന് പിന്നീട് തിരി‍ഞ്ഞു നോക്കേണ്ടി വന്നില്ല. മദ്രാസ്, ജിഗർത്തണ്ട, കബാലി, കാലാ, വട ചെന്നൈ, ജ​ഗമേ തന്തിരം, മഹാൻ, കൽക്കി, ജി​ഗർത്തണ്ട- ഡബിൾ എക്സ്, വാഴൈ, റെട്രോ തുടങ്ങി നിരവധി സിനിമകളിലെ അദ്ദേഹത്തിന്റെ പാട്ടുകൾ വൻ തരം​ഗമായി മാറി.

ഇന്ന് സന്തോഷ് നാരായണന്റെ 42-ാം ജന്മദിനം കൂടിയാണ്. തങ്ങളുടെ പ്രിയപ്പെട്ട സനയ്ക്ക് പിറന്നാൾ ആശംസകൾ നേരുന്നതിന്റെ തിരക്കിലാണ് സം​ഗീത പ്രേമികളും ആരാധകരും. നിരവധി പാട്ടുകൾ ഹിറ്റ് ലിസ്റ്റിൽ ഉള്ളയാളാണെങ്കിലും വളരെ അണ്ടറേറ്റഡ് ആയ ഒരു സം​ഗീത സംവിധായകൻ കൂടിയാണ് സന്തോഷ് നാരായണൻ എന്ന് പറയാതെ വയ്യ.

അദ്ദേഹത്തിന്റെയുള്ളിലെ പ്രതിഭയെ സം​ഗീതാസ്വാദകർക്ക് മുന്നിൽ ശരിക്കും അടയാളപ്പെടുത്തിയ ചില പാട്ടുകൾ ഉണ്ട്. ഈ പാട്ടുകൾ റിലീസ് ചെയ്തപ്പോൾ വേണ്ട രീതിയിൽ ശ്രദ്ധിക്കപ്പെട്ടിരുന്നില്ല. പോക പോകെ വർഷങ്ങൾക്കിപ്പുറം ആ പാട്ടുകളുടെ മൂല്യം പ്രേക്ഷകർ തിരിച്ചറിയുകയും ഏറ്റെടുക്കുകയും ചെയ്തു. സം​ഗീത പ്രേമികളെ വിസ്മയിപ്പിച്ച സന്തോഷ് നാരായണന്റെ ചില പാട്ടുകളിലൂടെ.

ജാസ് മ്യൂസിക്കായി സന്തോഷ് നാരായണൻ ഒരുക്കിയ പാട്ടായിരുന്നു പിസയിലെ ദിനക്കുധ. ഈ പാട്ടിലെ തമിഴ് സംഗീതത്തിന്റെയും ജാസിന്റെയും സംയോജനം അതിശയകരമായരുന്നു. കാർത്തിക് സുബ്ബരാജ് സംവിധാനം ചെയ്ത പിസയിൽ വിജയ് സേതുപതി, രമ്യ നമ്പീശൻ എന്നിവരയായിരുന്നു പ്രധാന വേഷത്തിലെത്തിയത്.

മീനാക്ഷിയും ധീയും ചേർന്നാണ് ദുഷ്ട എന്ന ​ഗാനം ആലപിച്ചിരിക്കുന്നത്. സന്തോഷ് നാരായണന്റെ അണ്ടറേറ്റഡ് ആയിട്ടുള്ള മറ്റൊരു പാട്ടാണിത്. ഈ പാട്ടിന് ഇന്ന് വലിയൊരു ഫാൻ ബേസ് തന്നെയാണുള്ളത്. കാർത്തിക് സുബ്ബരാജിനൊപ്പമുള്ള സന്തോഷ് നാരായണന്റെ മറ്റൊരു മാജിക് കൂടിയാണ് ഇരൈവി എന്ന ചിത്രത്തിൽ കാണാൻ കഴിയുക.

ജിപ്സിയിലെ ദേശാന്ധിരി എന്ന ​ഗാനത്തിന് അഡിക്റ്റ് ആയിട്ടുള്ളവർ ഏറെയാണ്. വിഷമിച്ചിരിക്കുമ്പോഴോ ഒറ്റയ്ക്കിരിക്കുമ്പോഴോ ഒക്കെ ഈ പാട്ടിനെ ആശ്രയിക്കുന്നവർ ഏറെയാണ്. രാജു മുരുകൻ സംവിധാനം ചെയ്ത് 2020 ൽ പുറത്തിറങ്ങിയ ചിത്രമായിരുന്നു ജിപ്സി. നടി നടാഷ സിങ്, സംവിധായകൻ ലാൽ ജോസ്, നടൻ സണ്ണി വെയ്ൻ എന്നിവരുടെ തമിഴ് അരങ്ങേറ്റം കൂടിയായിരുന്നു ഈ ചിത്രം.

സം​ഗീത പ്രേമികളുടെ ഏറ്റവും പ്രിയപ്പെട്ട പാട്ടുകളിൽ ഒന്നായിരുന്നു പാരിസ് ജയരാജ് എന്ന ചിത്രത്തിൽ സന്തോഷ് നാരായണൻ ഒരുക്കിയ കാവ ഉല്ല കല്ലുടി എന്ന പാട്ട്. അസൽ കോലാർ ആയിരുന്നു ​ഗാനം ആലപിച്ചത്. ജോൺസൺ കെ സംവിധാനം ചെയ്ത ചിത്രം 2021 ലാണ് റിലീസ് ചെയ്തത്.

രത്‌ന കുമാർ രചനയും സംവിധാനവും നിർവ്വഹിച്ച് 2022-ൽ പുറത്തിറങ്ങിയ റോഡ് ആക്ഷൻ കോമഡി ചിത്രമാണ് ഗുലു ഗുലു. അൻപാരെ എന്ന ചിത്രത്തിലെ ​​ഗാനം ആദ്യം വേണ്ടത്ര ശ്രദ്ധ നേടിയിരുന്നില്ല. ഇപ്പോൾ മലയാളികൾക്കിടയിൽ പോലും ഈ പാട്ട് സൂപ്പർ ഹിറ്റാണ്. ധീ ആണ് ​ഗാനം ആലപിച്ചിരിക്കുന്നത്. സന്താനവും നമിത കൃഷ്ണമൂർത്തിയുമാണ് ചിത്രത്തിൽ പ്രധാന വേഷങ്ങളിലെത്തിയത്.