'ഇതായിരുന്നു ഞങ്ങളുടെ അമ്മ'; അവര്‍ എന്നെ നോക്കി മാറി നിന്ന് കരഞ്ഞു; മറക്കാനാകാത്ത അനുഭവത്തെപ്പറ്റി ഉര്‍വശി

ഇന്ത്യന്‍ സിനിമയിലെ അതുല്യ പ്രതിഭകളിലൊരാളാണ് ഉര്‍വശി. രാജ്യം കണ്ട ഏറ്റവും മികച്ച അഭിനേതാക്കളില്‍ ഒരാള്‍. ഒരിക്കല്‍ കൂടി ദേശീയ പുരസ്‌കാരം സ്വന്തമാക്കി തന്റെ പേര് ചരിത്രത്തിന്റെ ഭാഗമാക്കി മാറ്റിയിരിക്കുകയാണ് ഉര്‍വശി.

തന്റെ കരിയറില്‍ ഏറ്റവും വലിയ സൗഭാഗ്യം ജീവിച്ചിരിക്കുന്നവരുടെ വേഷം അവതരിപ്പിക്കാന്‍ സാധിച്ചതാണെന്നാണ് ഉര്‍വശി പറയുന്നത്. യഥാര്‍ത്ഥ ആളുകളെ സിനിമയില്‍ അഭിനയിച്ചപ്പോഴുണ്ടായ അനുഭവങ്ങളും പങ്കുവെക്കുന്നുണ്ട് ഉര്‍വശി. മാതൃഭൂമി ആഴ്ചപ്പതിപ്പിന് നല്‍കിയ അഭിമുഖത്തില്‍ സംസാരിക്കുകയായിരുന്നു താരം.

''ജെ ബേബി സിനിമയില്‍ ഞാന്‍ അവതരിപ്പിച്ച കഥാപാത്രം ജീവിച്ചിരുന്ന ഒരു സ്ത്രീയുടേതാണ്. അവരുടെ വീട്ടില്‍ അവരുടെ മക്കളൊക്കെ ചുറ്റും നില്‍ക്കുമ്പോഴായിരുന്നു ഷൂട്ട് ചെയ്തത്. അവര്‍ ഓരോരുത്തരും മാറി നിന്ന് എന്നെ നോക്കി കരയുകയായിരുന്നു. ഇതായിരുന്നു ഞങ്ങളുടെ അമ്മ എന്ന് പറഞ്ഞ്. യഥാര്‍ത്ഥത്തില്‍ ഞാന്‍ അവരെ കണ്ടിട്ടുപോലുമില്ല'' എന്നാണ് ഉര്‍വശി പറയുന്നത്.

ലാല്‍ സലാം സിനിമ ചെയ്യുമ്പോള്‍ അതിലെ അന്നമ്മ എന്റെയടുത്ത് നില്‍പ്പുണ്ട്. അന്നമ്മയുടെ അടുത്തു നിന്ന് മുട്ടയും താറാവ് റോസ്റ്റും വാങ്ങി കഴിച്ചു കൊണ്ടാണ് ഷോട്ടിന് പോകുന്നത്. 1921 ല്‍ അഭിനയിച്ചപ്പോള്‍ അതിലെ അമ്മയെ പോയി കണ്ടിരുന്നു. മക്കളത് ചെയ്യുന്നോ നല്ലതാ എന്ന് പറഞ്ഞ് ആ അമ്മ കുറേ അനുഭവങ്ങള്‍ പങ്കുവച്ചു. അങ്ങനെ ജീവിച്ചിരിക്കുന്നവരുടെ റോള്‍ ചെയ്യാന്‍ പറ്റിയതൊക്കെയാണ് ഈയൊരു ജീവിതത്തിന്റെ സൗഭാഗ്യം എന്നാണ് താരം പറയുന്നത്.

ചെറുപ്രായത്തിലാണ് ഉര്‍വശി സിനിമയിലെത്തുന്നത്. പുറം ലോകവുമായി ബന്ധമില്ലെങ്കിലും മനുഷ്യാവസ്ഥകള്‍ മനസിലാക്കാന്‍ ഉര്‍വശിയെ സഹായിച്ചത് തന്റെ നിരീക്ഷണ പാടവമാണ്.

''ഞാനൊരിക്കലും ആള്‍ക്കാരില്‍ നിന്ന് അകന്നു കഴിഞ്ഞിട്ടില്ല. ഞങ്ങളൊരു കൂട്ടുകുടുംബത്തില്‍ നിന്നാണ് വരുന്നത്. അപ്പച്ചി, അമ്മായി, കുഞ്ഞമ്മ അങ്ങനെ എത്രയെത്ര ആളുകള്‍. അങ്ങനൊരു കൂട്ടുകുടുംബത്തിനകത്ത് ഒരുപാട് കാര്യങ്ങള്‍ നമുക്ക് നിരീക്ഷിക്കാനും പഠിക്കാനും കഴിയും. തലയണമന്ത്രം സിനിമയില്‍ ഞാന്‍ അവതരിപ്പിച്ച കഥാപാത്രം അക്ഷരാര്‍ത്ഥത്തില്‍ എന്റെയൊരു അമ്മായിയാണ് അവരിപ്പോഴും ജീവിച്ചിരിപ്പുണ്ട്'' എന്നാണ് ഉര്‍വശി പറയുന്നത്.