ശ്വാസതടസം; നടന്‍ ദിലീപ് കുമാർ ഐസിയുവിൽ 

മുംബൈ:  ശ്വാസതടസം അനുഭവപ്പെട്ടതിനെ തുടർന്ന്  മുതിര്‍ന്ന ബോളിവുഡ് നടൻ ദീലീപ് കുമാറിനെ (98) ആശുപത്രിയിൽ പ്രവേശിപ്പിച്ചു. ഇന്നലെ മുംബൈയിലെ ഹിന്ദുജ ആശുപത്രിയിൽ പ്രവേശിപ്പിച്ച അദ്ദേഹം ഇപ്പോൾ തീവ്രപരിചരണ വിഭാ​ഗത്തിൽ ചികിത്സയിലാണ്. അദ്ദേഹം നിരീക്ഷണത്തിലാണെന്നും ആരോഗ്യനില തൃപ്തികരമാണെന്നും ആശുപത്രി വ‍ൃത്തങ്ങൾ അറിയിച്ചു. 
 
ഈ മാസം ആദ്യം ആശുപത്രിയിൽ പ്രവേശിപ്പിച്ച അദ്ദേഹത്തെ രണ്ടാഴ്ച മുമ്പാണ് ഡിസ്ചാർജ്ജ് ചെയ്തത്. നടന്റെ പ്രായവും ബുദ്ധിമുട്ടുകളും കണക്കിലെടുത്താണ് ശ്വാസതടസമുണ്ടായതിനെ തുടർന്ന് ഇന്നലെ വീണ്ടും ആശുപത്രിയിലെത്തിച്ചത്. 

1944ൽ ബോളിവുഡില്‍ അരങ്ങേറ്റം കുറിച്ച ദിലീപ് കുമാർ ദേവദാസ്, കോഹിനൂര്‍, മുകള്‍ ഇ ആസം, രാം ഔര്‍ ശ്യാം തുടങ്ങി  65 ഓളം  ചിത്രങ്ങളില്‍ അഭിനയിച്ചിട്ടുണ്ട്. 1998ലാണ് അദ്ദേഹം അവസാനമായി സിനിമയില്‍ പ്രത്യക്ഷപ്പെട്ടത്‌. കഴിഞ്ഞ വര്‍ഷം കോവിഡ് ബാധിച്ച് ഇദ്ദേഹത്തിന്റെ രണ്ട് സഹോദരന്‍മാര്‍ മരണപ്പെട്ടിരുന്നു. സഹോദരങ്ങളായ അസ്‌ലം ഖാനും ഇഷാന്‍ ഖാനുമാണ് മരിച്ചത്.