നാല് പതിറ്റാണ്ട്, 400 ലേറെ ചിത്രങ്ങൾ; ഡൽഹി ​ഗണേഷ് വിടപറയുമ്പോൾ

നാല് പതിറ്റാണ്ടിലേറെ നീണ്ട സിനിമാ ജീവിതം, വിവിധ ഭാഷകളിലായി 400-ലധികം ചിത്രങ്ങൾ, മുൻ നിര നായകൻമാർക്കൊപ്പമെല്ലാം സ്ക്രീൻ പങ്കിടാനുള്ള അവസരം, ഏത് റോളും അനായാസേന കൈകാര്യം ചെയ്യുന്ന അസാമാന്യ പ്രതിഭ... അങ്ങനെ പറയാനാണെങ്കിൽ ഏറെയുണ്ട് ​ഡൽഹി ​ഗണേഷെന്ന നടനെക്കുറിച്ച്. സങ്കടമായാലും സന്തോഷമായാലും കോമഡിയായാലും അത് അഭിനയിച്ച് ഫലിപ്പിക്കാൻ അ​ദ്ദേഹത്തിനെന്നും പ്രത്യേക കഴിവ് തന്നെയായിരുന്നു.

സഹനടനായും വില്ലനായുമെല്ലാം അദ്ദേഹം സിനിമയിൽ തിളങ്ങി നിന്നു. കെ ബാലചന്ദർ സംവിധാനം ചെയ്ത പട്ടിന പ്രവേശം എന്ന ചിത്രത്തിലൂടെയായിരുന്നു ​ഗണേഷിന്റെ സിനിമാ അരങ്ങേറ്റം. 'ഡൽഹി ഗണേഷ്' എന്ന പേര് നൽകിയതും കെ ബാലചന്ദറായിരുന്നു. 1981 ൽ പുറത്തിറങ്ങിയ എങ്കമ്മ മഹാറാണി എന്ന ചിത്രമാണ് അദ്ദേഹത്തിന് പ്രേക്ഷക സ്വീകാര്യത നേടിക്കൊടുത്ത ചിത്രം. മലയാളത്തിലും നിരവധി സിനിമകളുടെ ഭാ​ഗമായിട്ടുണ്ട് ​ഗണേഷ്.

ദേവാസുരം, ധ്രുവം തുടങ്ങിയ ചിത്രങ്ങളിലൂടെ മലയാള സിനിമാ പ്രേക്ഷകരുടേയും ശ്രദ്ധ നേടി. ഷാരൂഖ് ഖാൻ നായകനായെത്തിയ ചെന്നൈ എക്സ്പ്രസ് എന്ന ചിത്രത്തിലും അദ്ദേഹം അഭിനയിച്ചു. ടെലിവിഷൻ രം​ഗത്തും തന്റെ സാന്നിധ്യമറിയിച്ചിരുന്നു ഡൽഹി ​ഗണേഷ്. എൺപതാം വയസിൽ വിടപറയുമ്പോൾ തമിഴ് സിനിമാ ലോകം ഒന്നടങ്കം അദ്ദേഹത്തിന്റെ വിയോ​ഗത്തിൽ ദു:ഖം രേഖപ്പെടുത്തുകയാണിപ്പോൾ. ഡൽഹി ​ഗണേഷിന്റെ പ്രേക്ഷകർ എക്കാലവും ഓർത്തിരിക്കുന്ന ചില ചിത്രങ്ങളിലൂടെ.

കെ ബാലചന്ദർ സംവിധാനം ചെയ്ത ചിത്രമായിരുന്നു സിന്ധു ഭൈരവി. ശിവകുമാർ, സുഹാസിനി, സുലക്ഷണ എന്നിവരായിരുന്നു ചിത്രത്തിലെ പ്രധാന താരങ്ങൾ. ഇളയരാജയായിരുന്നു ചിത്രത്തിന് സം​ഗീതമൊരുക്കിയത്. ചിത്രത്തിലെ ​ഗാനങ്ങളെല്ലാം ഇന്നും പ്രേക്ഷകരുടെ പ്രിയ ​ഗാനങ്ങളാണ്. മൂന്ന് ദേശീയ പുരസ്കാരങ്ങളും ചിത്രത്തെ തേടിയെത്തി. ​ഗുരുമൂർത്തി എന്ന കഥാപാത്രമായാണ് ചിത്രത്തിൽ ഡൽഹി ​ഗണേഷെത്തിയത്.

മണിരത്നം സംവിധാനം ചെയ്ത് കമൽ ഹാസൻ നായകനായെത്തിയ ചിത്രമാണ് നായകൻ. ശരണ്യ, കാർത്തിക, നാസർ, ഡൽഹി ഗണേശ്, ജനകരാജ് എന്നിവരായിരുന്നു പ്രധാന വേഷത്തിലെത്തിയത്. ചിത്രത്തിലെ അഭിനയത്തിന് കമൽ ഹാസനെ തേടി മികച്ച നടനുള്ള ദേശീയ പുരസ്കാരവുമെത്തിയിരുന്നു. ഇളയരാജ തന്നെയായിരുന്നു ചിത്രത്തിന്റെ സം​ഗീതവും. അയ്യർ എന്ന കഥാപാത്രത്തെയാണ് ​ഗണേഷ് ചിത്രത്തിൽ അവതരിപ്പിച്ചത്.

കെഎസ് രവികുമാർ സംവി‌ധാനം ചെയ്ത ചിത്രമാണ് തെനാലി. കമൽ ഹാസൻ, ജയറാം, ജ്യോതിക, ദേവയാനി എന്നിവരായിരുന്നു പ്രധാന വേഷങ്ങളിൽ. എ ആർ റഹ്മാനായിരുന്നു ചിത്രത്തിന് സം​ഗീതമൊരുക്കിയത്. ബോക്സോഫീസിലും വൻ വിജയമായി മാറിയ ചിത്രമായിരുന്നു ഇത്. ചിത്രത്തിലെ പഞ്ചഭൂതം എന്ന ഡൽ​ഹി ​ഗണേഷിന്റെ കഥാപാത്രവും ഏറെ ശ്രദ്ധ നേടി.

ദുരൈ സംവിധാനം ചെയ്ത് 1979 ൽ പുറത്തിറങ്ങിയ ചിത്രമാണ് പസി. ശോഭയും ​ഡൽഹി ​ഗണേഷും വിജയനുമായിരുന്നു ചിത്രത്തിൽ പ്രധാന വേഷത്തിലെത്തിയത്. മുനിയാണ്ടി എന്ന കഥാപാത്രമായാണ് ചിത്രത്തിൽ ഡൽഹി ​ഗണേഷെത്തിയത്. ചിത്രത്തിലെ അഭിനയത്തിന് തമിഴ്‌നാട് സംസ്ഥാന സർക്കാരിന്റെ പ്രത്യേക പുരസ്‌കാരവും ​ഗണേഷിനെ തേടിയെത്തി. ചിത്രത്തിന്റെ നൂറാം ദിനാഘോഷത്തിന് ഒരു ദിവസം മുൻപായിരുന്നു ചിത്രത്തിലെ നായിക ശോഭ മദ്രാസിലെ വസതിയിൽ ആത്മഹത്യ ചെയ്തത്.

കെ ബാലചന്ദർ രചനയും സംവിധാനവും നിർവഹിച്ച് 1977ൽ പുറത്തിറങ്ങിയ ചിത്രമാണ് പട്ടിന പ്രവേശം. ഡൽഹി ​ഗണേഷ്, ശരത് ബാബു, ശിവചന്ദ്രൻ തുടങ്ങിയ നടൻമാരുടെയെല്ലാം അരങ്ങേറ്റ ചിത്രം കൂടിയായിരുന്നു ഇത്. എംഎസ് വിശ്വനാഥനായിരുന്നു സം​ഗീത സംവിധാനമൊരുക്കിയത്.