'അപ്പുവിനെക്കുറിച്ച് പറയാൻ ഏറെ', ഹൃദയം പോസ്റ്റർ പുറത്തുവിട്ട് പ്രണവിന് വിനീതിന്റെ പിറന്നാൾ ആശംസ 

പ്രണവ് മോഹൻലാൽ, കല്യാണി പ്രിയദർശൻ, ദർശന രാജേന്ദ്രൻ എന്നിങ്ങനെ വലിയ താരനിരയുമായാണ് വിനീത് ശ്രീനിവാസൻ സംവിധാനം ചെയ്യുന്ന പുതിയ ചിത്രം 'ഹൃദയം' ഒരുങ്ങുന്നത്. ചിത്രത്തിനായി ഏറെ പ്രതീക്ഷയോടെ കാത്തിരിക്കുകയാണ് ആരാധകർ. ഇപ്പോഴിതാ ചിത്രത്തിലെ പ്രണവിന്റെ പുതിയ പോസ്റ്റർ പുറത്തുവന്നിരിക്കുകയാണ്. പ്രണവിന്റെ പിറന്നാൾ ദിനത്തിലാണ് വിനീത് പോസ്റ്റർ പങ്കുവച്ചിരിക്കുന്നത്. 

"അപ്പുവിനെക്കുറിച്ച് എനിക്ക് പറയാൻ ഏറെയുണ്ട്. പക്ഷെ സിനിമ റിലീസ് ചെയ്ത് ആളുകൾ അത് കാണുന്നത് വരെ ഞാൻ കാത്തിരിക്കും. ഇപ്പോൾ ഈ പോസ്റ്റർ ഞാനിവിടെ പങ്കുവയ്ക്കുന്നു. എത്രയും പ്രിയപ്പെട്ട പ്രണവിന് പിറന്നാൾ ആശംസകൾ", എന്ന് കുറിച്ചാണ് വിനീത് പോസ്റ്റർ പങ്കുവച്ചിരിക്കുന്നത്. 'ഹൃദയത്തോട് ഏറ്റവും ചേർന്നുനിൽക്കുന്ന ഒരു ചിത്രം' എന്നാണ് പ്രണവ് സിനിമയെക്കുറിച്ച് പറഞ്ഞിരിക്കുന്നത്. 

മകന് പിറന്നാൾ ആശംസിക്കാൻ മോഹൻലാൽ തെരഞ്ഞെടുത്തതും ഹൃദയത്തിന്റെ പോസ്റ്റർ തന്നെ. അപ്പുവിന് ആശംസ അറിയിച്ചതിനൊപ്പം ഹൃദയത്തിന്റെ മുഴുവൻ ടീമിനും വിജയാശംസകൾ നേരാനും മോഹൻലാൽ മറന്നില്ല.