ആ ഒറ്റ ശ്വാസ ഡയലോഗിന് പിന്നില്‍ ഇത്രയും കഷ്ട്പ്പാടുണ്ട്!; വൈറലായി സൂപ്പര്‍ ഡീലക്‌സിലെ വിജയ് സേതുപതിയുടെ ഡബ്ബിങ് വീഡിയോ

വിജയ് സേതുപതിയുടെ പുതിയ ചിത്രം സൂപ്പര്‍ ഡീലക്‌സിന്റെ ട്രെയിലര്‍ കഴിഞ്ഞ ദിവസം പുറത്തുവന്നിരുന്നു. ട്രാന്‍സ്‌ജെന്ററായി മക്കള്‍ സെല്‍വന്‍ എത്തുന്ന ഈ ചിത്രത്തില്‍ ഫഹദ് ഫാസിലും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. വിജയ് സേതുപതിയുടെ ശ്വാസം നിലപ്പിക്കുന്ന വിവരണത്തോടെയാണ് ചിത്രത്തിന്റെ ട്രെയിലര്‍ പുറത്തിറങ്ങിയത്. അത് തന്നെയാണ് ട്രെയിലറിന്റെ പ്രത്യേകതയും. ചിത്രത്തിന്റെ പിരിമുറുക്കം മുഴുവന്‍ മക്കള്‍ സെല്‍വന്റെ ആ ശ്വാസം വിടാതെയുള്ള വിവവരണത്തിലുണ്ട്. 

ആ വിവരണത്തിന് വേണ്ടി താരം നടത്തിയ കഷ്ടപ്പാടിന്റെ വീഡിയോ ആണ് ഇപ്പോള്‍ സോഷ്യല്‍ മീഡിയയില്‍ ചര്‍ച്ചാ വിഷയങ്ങളിലൊന്ന്. പല പ്രാവശ്യം ടേക്ക് എടുത്താണ് വിജയ് സേതുപതി ഈ വിവരണം നടത്തിയിരിക്കുന്നത്. ട്രെയിലറില്‍ പശ്ചാതല സംഗീതത്തിന് ഒപ്പം വരുന്ന ഈ വിവരണം സിനിമയില്‍ എങ്ങനെയായിരുക്കും എന്നറിയാനുള്ള കാത്തിരിപ്പിലാണ് പ്രേക്ഷകര്‍. 

ആരണ്യകാണ്ഡം എന്ന ആദ്യ ചിത്രത്തിലൂടെതന്നെ ദേശീയ അവാര്‍ഡ് കരസ്ഥമാക്കിയ ത്യാഗരാജന്‍ കുമാരരാജയാണ് ചിത്രം സംവിധാനം ചെയ്യുന്നത്. വിജയ് സേതുപതിക്കും ഫഹദിനും ഒപ്പം സമന്തയും രമ്യകൃഷ്ണനും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.