ചെന്നൈ: ചലച്ചിത്ര സംഗീത ശാഖയില്‍ എക്കാലത്തേയും മികച്ച സംഗീത സംവിധായകരുടെ കൂട്ടത്തിലാണ് എ ആര്‍ റഹ്മാന്റെ സ്ഥാനം. നിരവധി ഹിറ്റ് ഗാനങ്ങള്‍ക്ക് കയ്യോപ്പ് ചാര്‍ത്തിയതാണ് റഹ്മാന്റെ മാന്ത്രിക വിരലുകള്‍. ഇപ്പോള്‍ ആരാധകരുടെ ആകാംക്ഷ വര്‍ധിപ്പിച്ച് ഒരു ചലഞ്ചുമായി രംഗത്തുവന്നിരിക്കുകയാണ് എ ആര്‍ റഹ്മാന്‍.
ചുവന്ന ഷര്‍ട്ടും സണ്‍ ഗ്ലാസും ധരിച്ച ഒരു ചെറുപ്പക്കാരന്റെ വീഡിയോ ട്വിറ്ററില്‍ പങ്കുവെച്ചാണ് എ ആര്‍ റഹ്മാന്‍ ചലഞ്ചിന് ക്ഷണിച്ചിരിക്കുന്നത്. ഇത് ആരാണെന്ന് തിരിച്ചറിയാമോ എന്ന ചോദ്യം തലക്കെട്ടായി നല്‍കിയാണ് വീഡിയോ സോഷ്യല്‍മീഡിയയില്‍ പങ്കുവെച്ചിരിക്കുന്നത്. ഇതിന് പിന്നാലെ വീഡിയോയിലെ കഥാപാത്രം ആരാണെന്ന് തിരിച്ചറിഞ്ഞു എന്ന് അവകാശപ്പെട്ട് നിരവധി പേരുടെ കമന്റുകളാണ് വീഡിയോയുടെ ചുവടെ പ്രത്യക്ഷപ്പെട്ടത്.
ഇത് എ ആര്‍ റഹ്മാന്റെ മകനല്ലേ എന്ന തരത്തിലാണ് ചില കമന്റുകള്‍ പ്രത്യക്ഷപ്പെട്ടത്. നടന്‍ വിജയ് ആണെന്ന് ചിലര്‍ പറയുന്നു. അവരാരുമല്ല ഇത് വിജയിയുടെ മകനാണ് എന്ന് ഉറപ്പിച്ചുപറയുന്നു മറ്റു ചിലര്‍.
ഏതായാലും വിജയിയുടെ മകനും സിനിമ സംവിധായകനുമായ ജാസണ്‍ സഞ്ജയ് വിജയ് താങ്ക് യൂ സര്‍ എന്ന് പറഞ്ഞ് കമന്റിട്ടിട്ടുണ്ട്. ഇത് ഏറ്റെടുത്തും നിരവധി പ്രതികരണങ്ങള്‍ വരുന്നുണ്ട്. വീഡിയോയില്‍ കാണുന്നത് വിജയിയുടെ മകന്‍ ആണ് എന്ന് ഉറപ്പിച്ച് ജാസണിന് അഭിനന്ദനം നേര്‍ന്നാണ് ഈ കമന്റുകള്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
