പുതിയ ചിത്രത്തിന്റെ തിരക്കഥയുമായി സംവിധായകന്‍ ആര്‍.എസ് വിമല്‍ ശബരിമലയില്‍. തമിഴ് സൂപ്പര്‍ താരം വിക്രമിനെ നായകനാക്കി ഒരുക്കുന്ന ബിഗ് ബജറ്റ് ചിത്രമായ മഹാവീര്‍ കര്‍ണയുടെ പൂര്‍ത്തിയാക്കിയ തിരക്കഥയുമായാണ് സംവിധായകന്‍ മല കയറിയത്. ശബരിമലയില്‍ ദര്‍ശനം നടത്തിയതിന് ശേഷം പ്രത്യേക അനുഗ്രഹവും തേടി.
പൃഥ്വിരാജിനെ നായകനാക്കി മൂന്ന് വര്‍ഷം മുന്‍പാണ് കര്‍ണന്‍ പ്രഖ്യാപിക്കുന്നത്. പിന്നീട് നിര്‍മാതാവും നായകനും പിന്മാറിയതോടെ സിനിമ മുടങ്ങും എന്ന അവസ്ഥയിലായിരുന്നു. എന്നാല്‍ എല്ലാവരേയും ഞെട്ടിപ്പിച്ചുകൊണ്ടാണ് വിക്രമിനെ നായകനാക്കി കര്‍ണന്‍ വരുന്നു എന്ന വാര്‍ത്ത എത്തിയത്. 300 കോടി മുതല്‍മുടക്കില്‍ ഹിന്ദിയിലും തമിഴിലുമാണ് ചിത്രം നിര്‍മിക്കുന്നത്.
കഴിഞ്ഞ രണ്ട് വര്‍ഷത്തിനിടയില്‍ എട്ടു തവണയാണ് വിമല്‍ തിരക്കഥ മാറ്റി എഴുതിയത്. കര്‍ണന്റെ ചിത്രീകരണം ഒക്‌റ്റോബറില്‍ തുടങ്ങാനാണ് പദ്ധതി. റാമോജിഫിലിം സിറ്റി, ജയ്പൂര്‍, കാനഡ എന്നിവിടങ്ങളില്‍ സിനിമ ചിത്രീകരിക്കാനാണ് തീരുമാനം. സിനിമയുടെ മറ്റുജോലികള്‍ പുരോഗമിക്കുകയാണ്. ന്യൂയോര്‍ക്ക് ആസ്ഥാനമായ യുണൈറ്റഡ് ഫിലിം കിങ്ഡം ആണ് ചിത്രം നിര്‍മിക്കുന്നത്. 32 ഭാഷകളില്‍ ചിത്രം മൊഴിമാറ്റി പുറത്തിറക്കാനാണ് തീരുമാനം.
വിക്രത്തെ കൂടാതെ ബോളിവുഡ്, ഹോളിവുഡ് താരങ്ങളും ചിത്രത്തിലുണ്ടാകുമെന്നാണ് റിപ്പോര്‍ട്ട്. ഇവര്‍ ആരൊക്കെയായിരിക്കുമെന്ന് സ്ഥിരീകരണമായിട്ടില്ല. മലയാളത്തില്‍ നിര്‍മിക്കാനിരുന്ന കര്‍ണന്‍ അല്ല ഇതെന്നാണ് വിമല്‍ പറയുന്നത്. അന്താരാഷ്ട്ര നിലവാരത്തിലായിരിക്കും സിനിമ എടുക്കുക.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
