കല്‍ക്കി ഗര്‍ഭിണിയാണെന്നറിഞ്ഞപ്പോള്‍ അനുരാഗിന്റെ പ്രതികരണം ഇങ്ങനെയായിരുന്നു; തുറന്ന് പറഞ്ഞ് താരം

താന്‍ അമ്മയാകാന്‍ പോകുന്നുവെന്ന് വെളിപ്പെടുത്തി നടി കല്‍കി കൊച്‌ലിന്‍ രംഗത്തെത്തിയത് വാര്‍ത്തയായിരുന്നു. ഗയ് ഹേഷ്ബര്‍ഗ് എന്ന ഇസ്രായേലി പിയാനിസ്റ്റുമായി രണ്ട് വര്‍ഷമായി പ്രണയത്തിലാണ് കല്‍ക്കി. 

ഇപ്പോള്‍ താന്‍ അമ്മയാകാന്‍ പോകുന്ന വിവരം അറിഞ്ഞപ്പോള്‍ മുന്‍ ഭര്‍ത്താവും സംവിധായകനുമായ അനുരാഗ് കശ്യപിന്റെ ആദ്യ പ്രതികരണത്തെക്കുറിച്ച് തുറന്ന് പറയുകയാണ് താരം. മാതാപിതാക്കളുടെ കൂട്ടായ്മയിലേക്ക് സ്വാഗതം എന്നായിരുന്നു കല്‍ക്കിയോട് അനുരാഗ് ആദ്യമായി പറഞ്ഞത്. 

എന്തെങ്കിലും ആവശ്യമുണ്ടെങ്കില്‍ അറിയിക്കാനും അനുരാഗ് കല്‍ക്കിയോട് പറഞ്ഞു. 'അനുരാഗിന്റെ മകള്‍ ആലിയ വളര്‍ന്നത് എന്റെ കണ്‍മുന്‍പിലാണ്. അതുകൊണ്ടു തന്നെ അമ്മയുടെ ജോലി എന്താണെന്ന് എനിക്ക് കുറച്ച് അറിയാം'- കല്‍ക്കി പറയുന്നു. 

അനുരാഗ് കശ്യപിന്റെ ആദ്യ വിവാഹത്തിലെ മകളാണ് ആലിയ. എഡിറ്റര്‍ ആരതി ബജാജായിരുന്നു അനുരാഗിന്റെ മുന്‍ഭാര്യ. 1997ല്‍ വിവാഹിതരായ ഇവര്‍ 2009 ല്‍ വേര്‍പിരിഞ്ഞു. 

2011 ലാണ് കല്‍ക്കിയും അനുരാഗും തമ്മില്‍ വിവാഹിതരായത്. 2015ല്‍ വേര്‍പിരിയുകയും ചെയ്തു. വിവാഹമോചനത്തിന് ശേഷവും കല്‍ക്കിയും അനുരാഗ് കശ്യപും ഊഷ്മളമായ ബന്ധമാണ് സൂക്ഷിക്കുന്നത്.