കാത്തിരിപ്പിന് വിരാമം: ധനുഷ്- ഗൗതം മേനോന്‍ ചിത്രം ഉടന്‍ റിലീസിനെത്തും

ധനുഷും ഗൗതം മേനോനും ഒന്നിച്ചെത്തുന്ന ഏറ്റവും പുതിയ ചിത്രം 'എനൈ നോക്കി പായും തോട്ട' എന്ന ചിത്രം പ്രഖ്യാപിച്ചിട്ട് ഒരുപാടായെങ്കിലും റിലീസ് വൈകുകയായിരുന്നു. 2016ല്‍ റിലീസിനെത്തുമെന്ന് അണിയറപ്രവര്‍ത്തകര്‍ പ്രഖാപിച്ച ചിത്രത്തിന്റെ റിലീസ് പല കാരണങ്ങളാല്‍ നീണ്ടുപോയി. 

കാത്തിരിപ്പിന് വിരാമമിട്ട് കൊണ്ട് ചിത്രം ഉടനെ റിലീസിനെത്തും എന്നു വ്യക്തമാക്കിയിരിക്കുയാണ് അണിയറപ്രവര്‍ത്തകര്‍. ഏപ്രില്‍ മാസത്തില്‍ ചിത്രം പുറത്തിറക്കാനാണ് നീക്കം. ചിത്രത്തിന്റെ ട്രെയിലര്‍ പൂര്‍ത്തിയായിട്ടുണ്ട്. 2016ല്‍ ആയിരുന്നു ചിത്രത്തിന്റെ ആദ്യ ടീസര്‍ ഇറങ്ങിയത്. ഇതിന് വന്‍ സ്വീകാര്യതയായിരുന്നു ലഭിച്ചത്. 

ഗൗതം മേനോന്‍ രചനയും സംവിധാനവും നിര്‍വഹിച്ചിരിക്കുന്ന ചിത്രത്തില്‍ മേഘ ആകാശാണ് ധനുഷിന്റെ നായികയായെത്തുന്നത്. മലയാളിയായ ജോമോന്‍ ടി ജോണാണ് ചിത്രത്തിന്റെ ക്യാമറ കൈക്കാര്യം ചെയ്തിരിക്കുന്നത്. യുവന്‍ ശങ്കര്‍ രാജയാണ് സംഗീതം നിര്‍വഹിച്ചിരിക്കുന്നത്. ഗൗതം വാസുദേവ മേനോന്റെ എല്ലാ ചിത്രങ്ങളിലും ശ്രദ്ധ നേടാറുള്ളത് പാട്ടുകളാണ്. 'എനൈ നോക്കി പായും തോട്ട'യിലെ റിലീസ് ചെയ്ത ഗാനവും ഏറെ വൈറലായിരുന്നു. 'വിസിരി' എന്നു തുടങ്ങുന്ന ഗാനം 28 മില്യണ്‍ വ്യൂ ആണ് യൂട്യൂബില്‍ നേടിയത്.