കീർത്തി സുരേഷിന് പകരം പ്രിയാമണി, മൈദാനിൽ അജയ് ദേവ്ഗണിന്റെ നായികയാര്? 

അജയ് ദേവ്ഗണ്‍ നായകനായി എത്തുന്ന പുതിയ ചിത്രം മൈദാനിൽ നിന്ന് കീർത്തി സുരേഷ് പിന്മാറിയതായി റിപ്പോർട്ടുകളുണ്ടായിരുന്നു. സിനിമയിൽ അവതരിപ്പിക്കേണ്ട കഥാപാത്രത്തേക്കാൾ വളരെ പ്രായം കുറവാണ് കീർത്തിക്കെന്നതാണ് ഈ പിന്മാറ്റത്തിന് പിന്നിലെ കാരണം. മഹാനടി എന്ന ചിത്രത്തിൽ സാവിത്രിയായി വേഷമിട്ടത് കണക്കാക്കുമ്പോൾ ഈ സിനിമയോടെ കീർത്തി ടൈപ്കാസ്റ്റ് ചെയ്യപ്പെടാൻ സാധ്യതയുണ്ടെന്ന ചിന്ത നിർമാതാവ് ബോണി കപൂറിനേയും ഈ തീരുമാനത്തോട് യോജിപ്പിച്ചു. 

ഇപ്പോഴിതാ മൈദാനിൽ കീർത്തിക്ക് പകരം പ്രിയാമണിയാണ് നായികയാകുന്നതെന്നാണ് പുതിയ റിപ്പോർട്ടുകൾ. ഫുട്ബോള്‍ പരിശീലകന്‍ സയ്യിദ് അബ്ദുള്‍ റഹീമിനെക്കുറിച്ചാണ് സിനിമ. റഹീമായി അജയ് ദേവ്ഗണ്‍ എത്തുമ്പോൾ സയ്യിദ് അബ്ദുള്‍ റഹിമിന്റെ ഭാര്യയായിട്ടാണ് നായികാ കഥാപാത്രം. 

1952-1962 കാലഘട്ടത്തിലെ ഫുട്ബോള്‍ ചരിത്രം പറയുന്ന ചിത്രം അമിത് ശര്‍മ്മയാണ് സംവിധാനം ചെയ്യുന്നത്. ഇന്തോനേഷ്യയുടെ ജക്കാര്‍ത്ത, ഇറ്റലിയുടെ റോം, മെല്‍ബണ്‍ എന്നീ  നഗരങ്ങളിലാണ് മൈദാന്റെ ചിത്രീകരണം നടക്കുക.