ചൂടന്‍ മസാലദോശയുണ്ടാക്കി പ്രീതി സിന്റ, ക്വാറന്റൈനില്‍ പാചകം പഠിച്ച് താരം; ചിത്രം ഏറ്റെടുത്ത് ആരാധകർ 

വീട്ടിൽ അടച്ചിരിക്കുന്ന ക്വാറന്റൈൻ ദിനങ്ങൾ ആനന്ദകരമാക്കുകയാണ് ബോളിവുഡ് താരം പ്രീതി സിന്റ. പാചകപരീക്ഷണമാണ് താരത്തിന്റെ പുതിയ വിനോദം. സ്വന്തമായി ഉണ്ടാക്കിയ മസാല ദോശയുടെയും ചമ്മന്തികളുടെയും ചിത്രം ഇൻസ്റ്റ​ഗ്രാമിലൂടെ പങ്കുവച്ചാണ് താരം തന്റെ ക്വാറന്റൈൻ വിശേഷങ്ങൾ പങ്കുവച്ചിരിക്കുന്നത്. 

ലോസ് ആഞ്ചലസിലാണ് പ്രീതി ഇപ്പോഴുള്ളത്. താരത്തോടൊപ്പം അമ്മയും ഇവിടെയുണ്ട്. അമ്മയിൽ നിന്ന് റെസിപ്പി ചോദിച്ചറിഞ്ഞാണ് പ്രീതി പാചകത്തിൽ കൈവച്ചിരിക്കുന്നത്. എന്തായാലും ആദ്യ പരീക്ഷണം വിജയകരമാണെന്ന് ചിത്രത്തിൽ നിന്ന് വ്യക്തമാണ്. 

ക്വാറന്റൈനിൽ 16 ദിനങ്ങളാണ് പ്രീതിയും കുടുംബവും പിന്നിട്ടിരിക്കുന്നത്.  മുൻപ് വീട്ടിൽ ഹെഡ് മസാജ് ചെയ്ത് സമയം ചിലവഴിക്കുന്ന ചിത്രങ്ങളും താരം പങ്കുവച്ചിരുന്നു. അമ്മ തനിക്കും താൻ അമ്മയ്ക്കും ഹെഡ്മസാജ് ചെയ്തു നൽകുന്നതിന്റെ വിഡിയോയാണ് പ്രീതി പങ്കുവച്ചത്. ‘വീട്ടിലിരിക്കുന്ന നമ്മുടെ ഈ ദിനങ്ങൾ തലതണുപ്പിക്കാം. അമ്മയ്ക്ക് നല്ലൊരു ഹെഡ് മസാജ് നൽകാം. തിരിച്ചും ആകാം. മുഹമ്മദ് റഫിയുടെ നല്ല പാട്ടുകൾ കേൾക്കാം.’– പ്രീതി കുറിച്ചു.