ഹിന്ദു യുവാവിനെ വിവാഹം കഴിച്ചെന്ന വാര്‍ത്ത പ്രചരിപ്പിച്ചായിരുന്നു സമൂഹമാധ്യമങ്ങളില്‍ നടി അന്‍സിബയ്‌ക്കെതിരായ അതിക്രമം. ഹൈന്ദവ രീതിയിലെ വിവാഹ വേഷത്തില്‍ നിന്നും അന്‍സിബയുടേയും ഒരു യുവാവിന്റേയും ഫോട്ടോയും ഉള്‍പ്പെടുത്തിയായിരുന്നു അന്‍സിബയുടെ വിവാഹ വാര്‍ത്ത വിശ്വസനീയമായ രീതിയില്‍ ആരൊക്കെയോ ചേര്‍ന്ന് പ്രചരിപ്പിച്ചത്.
എന്നാല്‍ അത് വ്യാജ വാര്‍ത്തയാണെന്ന് വ്യക്തമാക്കിയിരിക്കുകയാണ് അന്‍സിബ. താന്‍ അഭിനയിച്ച ഒരു ഷോര്‍ട്ട് ഫിലിമിലെ വിവാഹ സീനില്‍ നിന്നും എടുത്ത ഫോട്ടോയാണ് ഇപ്പോള്‍ പ്രചരിപ്പിക്കുന്നത്. ഈ നിമിഷം വരെ ഞാന്‍ വിവാഹിതയായിട്ടില്ല, ഈയടുത്ത് വിവാഹം കഴിക്കാന്‍ ഉദ്ദേശിക്കുന്നില്ലെന്നും അന്‍സിബ വ്യക്തമാക്കുന്നു.
വിവാഹ വാര്‍ത്ത വ്യാജമാണെന്ന് അന്‍സിബ തന്നെ വ്യക്തമാക്കിയതോടെ വാര്‍ത്ത നല്‍കിയ ചില ഓണ്‍ലൈന്‍ മാധ്യമങ്ങള്‍ ഖേദം പ്രകടിപ്പിച്ചും വാര്‍ത്ത നല്‍കിയിട്ടുണ്ട്. തന്റെ വിവാഹ വാര്‍ത്ത നല്‍കിയ ഓണ്‍ലൈന്‍ മാധ്യമങ്ങള്‍ അത് തെറ്റായ വാര്‍ത്തയായിരുന്നു എന്ന് സമ്മതിച്ച് തന്നോട് ക്ഷമ ചോദിച്ചതായും അന്‍സിബ പറയുന്നു.
ഫേസ്ബുക്ക് ലൈവിലൂടെയായിരുന്നു അന്‍സിബ തന്റെ വിവാഹ വാര്‍ത്ത തെറ്റാണെന്ന് വ്യക്തമാക്കിയത്. സെലിബ്രിട്ടി എന്നതിനപ്പുറം സാധാരണ പെണ്‍കുട്ടിയാണ് ഞാന്‍. തെറ്റായ ഒരു വാര്‍ത്ത നല്‍കുമ്പോള്‍ നിങ്ങളുടെ വീട്ടിലും സ്ത്രീകള്‍ ഉണ്ടെന്ന് ഓര്‍ക്കണമെന്നും അന്‍സിബ പറയുന്നു.
വാര്‍ത്ത നല്‍കുന്നതിന് മുന്‍പ് മാധ്യമ പ്രവര്‍ത്തകര്‍ക്ക് തന്നെ വിളിച്ച് ചോദിക്കാമായിരുന്നു. ഇതുപോലൊരു ന്യൂസ് ഒരാളുടെ ലൈഫ് എത്രമാത്രം തകര്‍ക്കുമെന്ന് ചിന്തിക്കണം. സത്യമാണെന്ന് പോലും അന്വേഷിക്കാതെ എങ്ങിനെയാണ് വാര്‍ത്ത നല്‍കാനാകുന്നതെന്നും അന്‍സിബ ചോദിക്കുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates