തമന്നയെ വെറും സൗന്ദര്യ വസ്തുവാക്കി ? ; വിവാദത്തിൽ മനസ്സുതുറന്ന് രാജമൗലി 

ചെന്നൈ : ഇന്ത്യൻ ബോക്സ്ഓഫീസിനെ ഇളക്കിമറിച്ച ബ്രഹ്മാണ്ഡചിത്രം ബാഹുബലിയുടെ ആദ്യഭാഗത്തിൽ തമന്ന അഭിനയിച്ച അവന്തിക എന്ന കഥാപാത്രത്തെക്കുറിച്ച് ഉയർന്ന വിവാദങ്ങളിൽ മനസ്സ് തുറന്ന് സംവിധായകൻ രാജമൗലി. വിമർശനങ്ങൽ വേദനിപ്പിച്ചതായി രാജമൗലി പറഞ്ഞു. ഹാർവാർഡ് ഇന്ത്യ കോൺഫറൻസിൽ നൽകിയ അഭിമുഖത്തിലായിരുന്നു രാജമൗലിയുടെ പ്രതികരണം. 

വീരനായികയായി പ്രത്യക്ഷപ്പെടുന്ന അവന്തിക, പിന്നീട് നായകൻ പ്രഭാസിന്റെ നിഴലായി ഒതുങ്ങിപ്പോയെന്നായിരുന്നു പ്രധാന വിമർശനം. തമന്നയും പ്രഭാസും ഒരുമിച്ചെത്തിയ ഗാനവും വിമർശന വിധേയമായി. ​ഗാനരം​ഗത്ത് നടിയെ സംവിധായകൻ സൗന്ദര്യവസ്തു മാത്രമായാണ് കണ്ടതെന്നായിരുന്നു വിമർശനം. 

''വിമർശനങ്ങളിൽ ആദ്യം ദേഷ്യം തോന്നിയിരുന്നു. പിന്നീട് എനിക്ക് മനസ്സിലായി, ലോകത്ത് പലതരം ആളുകളുണ്ട്, അതൊന്നും കാര്യമാക്കേണ്ട എന്ന്. അവന്തിക എന്നെ സംബന്ധിച്ച് മനോഹരമായ സൃഷ്ടിയാണ്. അതിലെ ആ ഗാനരംഗവും അങ്ങനെ തന്നെയാണ്. ബാഹുബലി ഇന്നാണ് ഞാൻ സംവിധാനം ചെയ്യുന്നത് എങ്കിൽ ഒരു ഫ്രെയിമിൽ പോലും മാറ്റമുണ്ടാകില്ല. ചിത്രത്തെക്കുറിച്ച് തനിക്ക് അഭിമാനമുണ്ടെന്നും രാജമൗലി പറഞ്ഞു. രണ്ടാം ഭാഗത്തിൽ തമന്നക്ക് ക്ലൈമാക്സ് രംഗത്തിൽ മാത്രം അവസരം നൽകിയതിനെയും പരിപാടിയിൽ ചിലർ വിമർശിച്ചിരുന്നു.