നടിയെ ആക്രമിച്ച കേസ് നീണ്ടുപോകുന്നതില്‍ വേദനയെന്ന് പാര്‍വ്വതി 

കൊച്ചി: നടിയെ തട്ടിക്കൊണ്ടുപോയി ആക്രമിച്ച കേസ് നീണ്ടുപോകുന്നതില്‍ വേദനയുണ്ടെന്ന് നടി പാര്‍വ്വതി. വൈകിയാലും നീതി കിട്ടുക തന്നെ ചെയ്യുമെന്നും പാര്‍വ്വതി പറഞ്ഞു. സിനിമയില്‍ സ്ത്രീകള്‍ സുരക്ഷിതരാണെന്ന പ്രതീക്ഷ ഡബ്ല്യൂസിസി നല്‍കിയെന്നും സംഘടനയുടെ പ്രസക്തി നഷ്ടപ്പെട്ടിട്ടില്ലെന്നും പാര്‍വ്വതി പറഞ്ഞു.

നടി ആക്രമിക്കപ്പെട്ട വിഷയത്തില്‍ നിലപാട് എടുത്തതിന്റെ പേരില്‍ പ്രതിസന്ധി നേരിടേണ്ടി വന്നിട്ടുണ്ടെന്നും പാര്‍വ്വതി പറഞ്ഞു. ഈ നിലപാടുകള്‍ കാരണം സിനിമകള്‍ നഷ്ടപ്പെടുന്ന സാഹചര്യമുണ്ടായിട്ടുണ്ടെന്നും അവര്‍ പറഞ്ഞു. നടിയെ ആക്രമിച്ച കേസുമായി ബന്ധപ്പെട്ട് എറണാകുളത്തെ വിചാരണക്കോടതിയില്‍ നടപടികള്‍ പുരോഗമിക്കുന്നതിനിടെയാണ് പാര്‍വ്വതിയുടെ പ്രതികരണം. 

നടിയെ ആക്രമിച്ച കേസില്‍ താരസംഘടനയായ അമ്മയുടെ നിലപാടില്‍ പരസ്യമായി എതിര്‍പ്പ് പ്രകടിപ്പിച്ച് പാര്‍വ്വതി രംഗത്തുവന്നത്
അന്ന് വാര്‍ത്തയായിരുന്നു.