'നാടിന്റെ രക്ഷകനെ ഞങ്ങൾക്ക് നഷ്ടമായി'; ഈ തെരുവിന് ഇനി ഇർഫാന്റെ പേര്  

അന്തരിച്ച നടൻ ഇർഫാൻ ഖാനോടുള്ള ആദരസൂചകമായി മഹാരാഷ്ട്രയിലെ ഇ​ഗത്പുരി ​​ഗ്രാമത്തിലെ തെരുവിന് നടന്റെ പേര് നൽകി ​ഗ്രാമവാസികൾ.  'ഹീറോ-ചി-വാദി' എന്നാണ് പുതിയ പേര്. 'നായകന്റെ ദേശം' എന്നാണ് ഈ വാക്കിന്റെ അർത്ഥം. സിനിമ നടൻ എന്നതിലപ്പുറം ഇർഫാൻ എന്ന വ്യക്തിയോടുള്ള അടുപ്പമാണ് ഈ തീരുമാനത്തിന് പിന്നിലെ കാരണം. 

ഇർഫാന്റെ ഫാം ഹൗസ് സ്ഥിതി ചെയ്യുന്നത് ഈ ഇ​ഗത്പുരിയിലായതിനാൽ ഇർഫാനെ വ്യക്തിപരമായി ഇവർക്കറിയാം. "നാടിന്റെ രക്ഷകനെ ഞങ്ങൾക്ക് നഷ്ടമായി. ഞങ്ങൾക്ക് അദ്ദേഹം സിനിമാ നടൻ മാത്രമായിരുന്നില്ല. അടുത്ത സുഹൃത്തുമായിരുന്നു. ഞങ്ങളുടെ നാടിന്റെ വികസനത്തിനായി അദ്ദേഹം ഒരുപാട് കാര്യങ്ങൾ ചെയ്തിരുന്നു. അതുകൊണ്ടു തന്നെ ഈ തെരുവ് ഇനി അദ്ദേഹത്തിന്റെ പേരിൽ അറിയപ്പെടും", ​ഗ്രാമവാസികളുടെ വാക്കുകൾ ദേശീയ മാധ്യമങ്ങൾ റിപ്പോർട്ട് ചെയ്തു.

പത്ത് വർഷമായി ഇ​ഗത്പുരിയിലെ സ്ഥിരം സന്ദർശകനാണ് ഇർഫാൻ. കമ്പ്യൂട്ടർ ആംബുലൻസ് അടക്കമുള്ള സഹായങ്ങൾ ഇവിടേക്കെത്തിക്കാൻ ഇർഫാന് കഴി‍ഞ്ഞിട്ടുണ്ട്. സ്കൂൾ കുട്ടികൾക്കുള്ള പുസ്തകങ്ങൾ, മഴക്കോട്ട്, സ്വെറ്റർ എന്നിങ്ങനെ നീളും ​ഗ്രാമവാസികൾക്കായുള്ള ഇർഫാന്റെ കരുതൽ. 

വൻകുടലിലെ അണുബാധയെത്തുടർന്ന് കഴിഞ്ഞ മാസം 29നാണ് ഇർഫാൻ മരിച്ചത്. 2018ൽ നടന് ന്യൂറോ എൻഡോക്രൈൻ ട്യൂമർ സ്ഥിരീകരിച്ചിരുന്നു. മുംബൈയിലെ കോകിലബെൻ ധീരുഭായ് അംബാനി ആശുപത്രിയിൽ വെച്ചായിരുന്നു അന്ത്യ‌ം