'പരസ്യക്കമ്പനികളില്‍ ജോലി ചെയ്തുണ്ടാക്കിയ എന്റെ 20 ലക്ഷമാണ് അവര്‍ തട്ടിയെടുത്തത്': നോറ ഫത്തേഹി

പ്രശസ്ത മോഡലും നര്‍ത്തകിയുമായ നോറ ഫത്തേഹി ബോളിവുഡില്‍ അറിയാത്തവരുണ്ടാകില്ല. വളരെപ്പെട്ടെന്നാണ് തകര്‍പ്പന്‍ നൃത്തച്ചുവടുകളുമായി അവര്‍ പ്രേക്ഷകമനസില്‍ കയറിപ്പറ്റിയത്. കായംകുളം കൊച്ചുണ്ണി എന്ന ചിത്രത്തിലൂടെ മലയാളികള്‍ക്കും നോറയെ പരിചയമുണ്ട്. 

എന്നാല്‍ ഇന്ത്യ വിദേശികള്‍ക്ക് ജീവിക്കാന്‍ വളരെ ബുദ്ധിമുട്ടുള്ള രാജ്യമാണെന്ന് തുറന്ന് പറയുകയാണ് ഇവര്‍. തനിക്കുണ്ടായ ഒരു ദുരനുഭവത്തിന്റെ വെളിച്ചത്തിലാണ് നോറ ഇങ്ങനെ പറഞ്ഞത്. ഒരു കാസ്റ്റിങ് ഏജന്റ് നോറയുടെ 20 ലക്ഷം രൂപയാണ് തട്ടിയെടുത്തത്. അതും താരം പരസ്യക്കമ്പനികളില്‍ ജോലി ചെയ്തുണ്ടാക്കിയ പണം. 

കാനഡയില്‍ നിന്നും ഇന്ത്യയിലെത്തി ആദ്യം ജോലി ചെയ്ത പരസ്യ ഏജന്‍സില്‍ നിന്നാണ് നോറയ്ക്ക് മോശം അനുഭവം നേരിടേണ്ടി വന്നത്. തന്റെ പണം തട്ടിയെടുത്ത ഏജന്റ് വളരെ പ്രകോപനപരമായുമാണ് സംസാരിച്ചതെന്നും അവര്‍ പറഞ്ഞു. 

മാത്രമല്ല, ഭാഷ അറിയാത്തതിനാലും സംസാരരീതിയുടെ പേരിലും താന്‍ ഒരുപാട് അവഹേളിക്കപ്പെട്ടിട്ടുണ്ടെന്ന് നോറ പറയുന്നു. സഹപ്രവര്‍ത്തകര്‍ തന്നെ ക്രൂരമായി കളിയാക്കിയതിനാല്‍ കരഞ്ഞ് കൊണ്ട് വീട്ടിലെത്തിയ അനുഭവം വരെ നോറ തുറന്ന് പറഞ്ഞു. 

'ഒരു ദിവസം ആ ഏജന്റ് എന്നോട് പറഞ്ഞു, നിങ്ങളെ ഇനിടെ ഇനി ആവശ്യമില്ല, തിരിച്ച് പൊയ്‌ക്കോളു എന്ന്, ഞാനത് ഒരിക്കലും മറക്കില്ല'- നോറ കൂട്ടിച്ചേര്‍ത്തു. 

സത്യേവ ജയതേ എന്ന ജോണ്‍ എബ്രഹാം ചിത്രത്തിന് വേണ്ടി നോറ ചുവട് വച്ച ദില്‍ബര്‍ എന്ന ഗാനമാണ് നോറയെ പ്രേക്ഷകരുടെ പ്രിയങ്കരിയാക്കി മാറ്റിയത്. മലയാളത്തില്‍ റോഷന്‍ ആന്‍ഡ്രൂസ് സംവിധാനം ചെയ്യുന്ന കായംകുളം കൊച്ചുണ്ണി എന്ന ചിത്രത്തിലൂടെ മലയാളത്തിലും ഇവര്‍ ശ്രദ്ധിക്കപ്പെട്ടിരുന്നു.