'പെണ്ണേ, തളരരുത്; അണയാതെ തീജ്വാലയാവട്ടെ'; അമൃത സുരേഷിന്റെ വീഡിയോ ആല്‍ബം പുറത്തിറങ്ങി

കൊച്ചി: കണ്ണീര്‍ വാര്‍ത്ത് തളരാനല്ല നിങ്ങളുടെ ജീവിതമെന്ന് ഓര്‍മ്മപ്പെടുത്തിക്കൊണ്ട് സ്ത്രീകള്‍ക്കായ് ഗായിക അമൃത സുരേഷ് അണിയിച്ചൊരുക്കിയ 'അണയാതെ' വീഡിയോ ആല്‍ബം പുറത്തിറങ്ങി.
അമൃത സുരേഷ് തന്നെയാണ് ഇതില്‍ പാടി അഭിനയിച്ചിട്ടുള്ളത്. ചിത്രാഞ്ജലി സ്റ്റുഡിയോയില്‍ വച്ചായിരുന്നു ഷൂട്ടിംഗ്. വിപിന്‍ദാസാണ് സംവിധാനം. ആര്‍. വേണുഗോപാല്‍ രചിച്ച വരികള്‍ക്ക് ഈണമിട്ടതും അമൃത തന്നെയാണ്. കുഗന്‍ എസ്. പലാനിയാണ് ക്യാമറ.

ഒറ്റപ്പെട്ടുപോയ സ്ത്രീകളോട് ജീവിതത്തിന്റെ നിറങ്ങളിലേക്ക് കാറ്റിനെ ഊര്‍ജ്ജത്തോടെയും പൂക്കളെപ്പോലെ പുഞ്ചിരിച്ചും അരുവികളെപ്പോലെ സന്തോഷവതിയായും ഉയര്‍ന്നുവരൂ എന്ന് ഉദ്‌ഘോഷിച്ചുകൊണ്ടാണ് വീഡിയോ ആല്‍ബം അവസാനിക്കുന്നത്. വ്യത്യസ്തമായ കാഴ്ചകളൊരുക്കിയ 'അണയാതെ' സ്ത്രീകള്‍ക്കൊരു കൈവിളക്കായി മാറുകയാണ്.