ജിത്തു ജോസഫ് ചിത്രം ആദിയിലൂടെ നായകനായി അരങ്ങേറ്റം കുറിച്ച പ്രണവ് മോഹന്‍ലാല്‍ വീണ്ടും നായകനാകുന്നുവെന്ന വാര്‍ത്ത ഏതാനും ദിവസങ്ങള്‍ക്ക് മുന്‍പ് പുറത്തു വന്നിരുന്നു. അരുണ്‍ ഗോപിയുടെ ചിത്രത്താലാണ് പ്രണവ് അടുത്തതായി അഭിനയിക്കാന്‍ പോകുന്നത്. പ്രണവിന്റെ ആദ്യ ചിത്രത്തില്‍ നിന്നും ഏറെ വ്യത്യസ്തമായ ഇത് ഒരു പ്രണയചിത്രം ആണെന്നാണ് സൂചന.
തന്റെ പുതിയ ചിത്രത്തിലേക്ക് നായികയായി അഭിനയിക്കാന്‍ ആളെ വേണമെന്ന് അറിയിച്ച് കൊണ്ട് അരുണ്‍ ഗോപി ഫേസ്ബുക്കില്‍ പങ്കുവെച്ച ഒരു കുറിപ്പില്‍ നിന്നാണ് ചിത്രത്തിന്റെ കൂടുതല്‍ വിവരങ്ങള്‍ ലഭിച്ചത്. നായികയെ കണ്ടെത്താനായി മാര്‍ച്ച് 22, 23 തീയതികളില്‍ ദുബായില്‍ വെച്ച് ഓഡീഷന്‍ നടത്തുന്നുണ്ടെന്ന വിവരമാണ് അദ്ദേഹം ഇപ്പോള്‍ പോസ്റ്റിലൂടെ അറിയിച്ചിട്ടുള്ളത്.
ആദിയില്‍ നിന്നും വ്യത്യസ്തമായി പ്രണയത്തിന് പ്രാധാന്യം നല്‍കിയാണ് സിനിമ ഒരുക്കുന്നതെന്നും അരുണ്‍ ഗോപി വ്യക്തമാക്കിയിരുന്നു.
ഓഡീഷനിലൂടെ തിരഞ്ഞെടുക്കപ്പെടുന്ന പുതുമുഖമായിരിക്കും പ്രണവിന്റെ നായികയായി എത്തുകയെന്നും സംവിധായകന്‍ വ്യക്തമാക്കിയിരുന്നു.
മുളകുപാടം ഫിലിംസിന്റെ ബാനറില്‍ ടോമിച്ചന്‍ മുളകുപാടമാണ് ചിത്രം നിര്‍മ്മിക്കുന്നത്. മോഹന്‍ലാലിന്റെ പുലിമുരുകന്റെ നിര്‍മ്മാതാവും ടോമിച്ചന്‍ ആയിരുന്നു. ചിത്രത്തിന്റെ ഷൂട്ടിംഗ് ജൂണില്‍ ആരംഭിക്കുമെന്ന വിവരം ടോമിച്ചന്‍ നേരത്തേ അറിയിച്ചിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
