പ്രശസ്ത തമിഴ് നടന്‍ ബാലാ സിങ് അന്തരിച്ചു

ചെന്നൈ: പ്രശസ്ത തമിഴ് നടന്‍ ബാലാ സിങ് അന്തരിച്ചു. 67 വയസ്സായിരുന്നു. ഭക്ഷ്യവിഷബാധയെ തുടര്‍ന്ന് കുറച്ചു ദിവസങ്ങള്‍ക്ക് മുമ്പ് അദ്ദേഹത്തെ ചെന്നൈയിലെ വിജയ ആശുപത്രിയില്‍ പ്രവേശിപ്പിച്ചിരുന്നു. സൂപ്പര്‍ ഹിറ്റ് ചിത്രങ്ങളായ വിരുമാണ്ടി, ഇന്ത്യന്‍, പുതുപ്പേട്ടൈ, സാമി തുടങ്ങി നിരവധി സിനിമകളില്‍ അഭിനിയിച്ചിട്ടുണ്ട്.

നാഷണല്‍ സ്‌കൂള്‍ ഓഫ് ഡ്രാമയില്‍ പഠിച്ചിറങ്ങിയ ശേഷം നാടക നടനായി അഭിനയ ജീവിതം ആരംഭിച്ച അദ്ദേഹം, മലമുകളിലെ ദൈവം എന്ന മലയാള ചിത്രത്തില്‍ കൂടിയാണ് സിനിമാ രംഗത്തേത്ത് കടന്നുവന്നത്. ഉയരും ഞാന്‍ നാടാകെ, ജംഗിള്‍ ബോയ്, തടവറയിലെ രാജകുമാരി തുടങ്ങിയ ചിത്രങ്ങളിലും അഭിനയിച്ചു. 1995ല്‍ പുറത്തിറങ്ങിയ അവതാരമാണ് തമിഴിലെ അദ്ദേഹത്തിന്റെ അരങ്ങേറ്റ ചിത്രം. 2004ല്‍ കേരള ഹൗസ് ഉടന്‍ വില്‍പനക്ക്, 2008ല്‍ മുല്ല എന്നീ മലയള ചിത്രങ്ങളിലും അഭിനയിച്ചു.  2019ല്‍ പുറത്തിറങ്ങിയ ആര്യയുടെ മഗാമുനിയാണ് അവസാന ചിത്രം.