ബി​ഗ്ബോസിൽ വണ്ണത്തിന്റെ പേരിൽ പലരും കളിയാക്കി, ആറുമാസം കൊണ്ട് കുറച്ചത് പന്ത്രണ്ടു കിലോ; പുതിയ ലുക്കിൽ പ്രിയ​ഗായിക 

പ്രമുഖ റിയാലിറ്റി ഷോയായ ബി​ഗ്ബോസിന്റെ ഹിന്ദി പതിപ്പിൽ ഏറെ ആരാധകരെ സ്വന്തമാക്കിയ മത്സരാർത്ഥികളിൽ ഒരാളാണ് ഷെഹ്നാസ് ​ഗിൽ. ബി​ഗ്ബോസ് ഹൗസിലെ ചബ്ബിതാരമായിരുന്നു പഞ്ചാബ് കി കത്രീന എന്ന് വിളിപ്പേരുള്ള ​ഗായിക. എന്നാലിപ്പോൾ വണ്ണം കുറച്ച് പുത്തൻ ലുക്കിലെത്തി ആരാധകരെ ഞെട്ടിച്ചിരിക്കുകയാണ് ഷെഹ്നാസ്. ആറുമാസം കൊണ്ട് പന്ത്രണ്ടു കിലോയാണ് താരം കുറച്ചത്. 

ബി​ഗ്ബോസ് ഹൗസിനകത്ത് വണ്ണത്തിന്റെ പേരിൽ തന്നെ പലരും കളിയാക്കിയിരുന്നെന്നും അതാണ് പുതിയ മാറ്റത്തിനുള്ള കാരണമെന്നും ഷെഹ്നാസ് പറഞ്ഞു. തനിക്കും വണ്ണം കുറച്ച് കാണിക്കാൻ കഴിയുമെന്ന് തെളിയിക്കണമായിരുന്നു. അങ്ങനെയാണ് അറുപത്തിയേഴു കിലോയിൽ നിന്ന് വണ്ണം കുറയ്ക്കാൻ പരിശ്രമിച്ചതെന്ന് ഷെഹനാസ് പറയുന്നു. മാർച്ചിൽ തുടങ്ങിയ പരിശ്രമം ഫലം കണ്ടുവെന്നും ഇപ്പോൾ അമ്പത്തിയഞ്ചു കിലോയാണ് തന്റെ ഭാരമെന്നും താരം പറഞ്ഞു. 

ഭക്ഷണത്തിന്റെ അളവു കുറച്ചു തന്നെയാണ് താൻ വണ്ണം കുറച്ചതെന്നും നോൺവെജ് ഭക്ഷണങ്ങളും ചോക്ലേറ്റുകളും ഐസ്ക്രീമുമൊക്കെ പാടേ ഉപേക്ഷിക്കുകയായിരുന്നെന്നും ഷെഹ്നാസ് പറഞ്ഞു. ഭക്ഷണത്തിൽ ഒരുപാട് വെറൈറ്റികൾ ഉൾക്കൊള്ളിച്ചിരുന്നില്ല. പരിപ്പും ചെറുപയറുമൊക്കെയാണ് ഉച്ചയ്ക്ക് കഴിക്കുന്നതെങ്കിൽ രാത്രിയും അത് തന്നെ കഴിക്കും, അതും അളവ് കുറച്ച്. രണ്ട് റൊട്ടി കഴിക്കാൻ തോന്നിയാൽ ഒരെണ്ണത്തിൽ ഒതുക്കും- താരം പറഞ്ഞു.