ഞാന്‍ നിര്‍ബന്ധിച്ചാണ് മഞ്ജുവിന് പ്രതിഫലം നല്‍കിയത്; തുറന്നു പറഞ്ഞ് നിര്‍മാതാവ് (വിഡിയോ)

മഞ്ജു വാര്യര്‍ ആദ്യമായി അഭിനയിക്കുന്ന തമിഴ് ചിത്രം അസുരനു വേണ്ടി വളരെ പ്രതീക്ഷയോടെ കാത്തിരിക്കുകയാണ് ആരാധകര്‍. വെട്രിമാരന്‍ സംവിധാനം ചെയ്യുന്ന ചിത്രത്തില്‍ തെന്നിന്ത്യന്‍ സൂപ്പര്‍താരം ധനുഷിന്റെ നായികയായാണ് മഞ്ജു തമിഴില്‍ അരങ്ങേറ്റം കുറിക്കുന്നത്. ചിത്രത്തില്‍ അഡ്വാന്‍സ് മാത്രം കൈപ്പറ്റിയാണ് മഞ്ജു അഭിനയിച്ചത് എന്നാണ് നിര്‍മാതാവ് കലൈപ്പുളി എസ് തനു പറയുന്നത്. കഴിഞ്ഞ ദിവസം നടന്ന ഓഡിയോ ലോഞ്ചില്‍ വെച്ചായിരുന്നു അദ്ദേഹത്തിന്റെ വെളിപ്പെടുത്തല്‍. 

അഡ്വാന്‍സ് മാത്രം വാങ്ങിയാണ് മഞ്ജു അഭിനയിക്കാന്‍  എത്തിയത്. പിന്നീട് അതിനെക്കുറിച്ച് മഞ്ജു സംസാരിച്ചിരുന്നില്ല. താനാണ് നിര്‍ബന്ധിച്ച് പണം നല്‍കിയത്.' നിര്‍മാതാവ് പറഞ്ഞു. ചിത്രത്തിലെ മഞ്ജുവിന്റെ പ്രകടനത്തെ ധനുഷ് പുകഴ്ത്തി. മഞ്ജു അഭിനയിക്കുകയാണെന്ന് പോലും തോന്നില്ലെന്നും അഭിനയം കണ്ട് ഭയന്നു പോയെന്നുമാണ് താരം പറയുന്നത്. മഞ്ജുവിനൊപ്പം അഭിനയിക്കണമെന്നത് ഏറെനാളായുള്ള ആഗ്രഹമായിരുന്നെന്നും അത് സാധ്യമായതില്‍ സന്തോഷമുണ്ടെന്നും അദ്ദേഹം കൂട്ടിച്ചേര്‍ത്തു. 

'ദീര്‍ഘനാളുകളായി മഞ്ജു എന്റെ അടുത്ത സുഹൃത്താണ്. എന്നാല്‍ അവര്‍ക്കൊപ്പം പ്രവര്‍ത്തിക്കണമെന്നത് വലിയ ആഗ്രഹമാണ്.  ആരുടെയെങ്കിലും അഭിനയം കണ്ട് ഭയന്നുപോയിട്ടുണ്ടെങ്കില്‍ അത് മഞ്ജുവിന്റെ പ്രകടനം കണ്ടിട്ടാണ്. അവര്‍ അഭിനയിക്കുന്നുണ്ടെന്നു പോലും അറിയാന്‍ കഴിയില്ല. അഭിനയം പൂര്‍ത്തിയാക്കി കഥാപാത്രത്തില്‍ നിന്ന് പുറത്തുകടക്കാന്‍ ഞാന്‍ കഷ്ടപ്പെടുമ്പോള്‍ മഞ്ജു വളരെ പെട്ടെന്നാണ് അതില്‍ നിന്ന് പുറത്തുകടക്കുന്നത്' ധനുഷ് പറഞ്ഞു. മുപ്പത്തിയാറാം വയസില്‍ അസുരനില്‍ ഇങ്ങനെയൊരു കഥാപാത്രം എനിക്ക് തന്നതില്‍ വെട്രിമാരനോട് നന്ദി പറയുന്നെന്നും താരം കൂട്ടിച്ചേര്‍ത്തു. 

ധനുഷിനൊപ്പം ഒന്നിച്ച് പ്രവര്‍ത്തിച്ചതിനെക്കുറിച്ച് മഞ്ജു വാചാലയായി. 'ധനുഷ് എന്റെ പ്രിയപ്പെട്ട സുഹൃത്താണ്. ഇപ്പോള്‍ എന്റെ പ്രിയപ്പെട്ട സഹതാരം കൂടി ആയിരിക്കുന്നു. ഞാന്‍ അദ്ദേഹത്തിന്റെ വലിയൊരു ആരാധികയാണ്. മലയാളത്തിലെ പോലൊരു അന്തരീക്ഷം തന്നെയായിരുന്നു ഈ ചിത്രത്തിന്റെ സെറ്റിലും എനിക്ക് അനുഭവിക്കാന്‍ കഴിഞ്ഞത്. യൂണിറ്റിലുള്ള എല്ലാവരും വളരെ സ്‌നേഹത്തോടെയാണ് പെരുമാറിയത്. അവരൊക്കെ എന്റെ മുന്‍പില്‍ ഇരിക്കുന്നുണ്ട്. എല്ലാവരെയും ഞാന്‍ സ്‌നേഹത്തോടെ ഓര്‍ക്കുന്നു' മഞ്ജു വാര്യര്‍ പറഞ്ഞു. മലയാളത്തിന്റെ അഭിനയ സരസ്വതിയെന്നാണ് മഞ്ജുവിനെ വിശേഷിപ്പിച്ചത്. ഇനിയും ഒരുപാട് തമിഴ് ചിത്രങ്ങളില്‍ അഭിനയിക്കാന്‍ താല്‍പ്പര്യമുണ്ടെന്നും താരം വ്യക്തമാക്കി. 

അഡ്വാന്‍സ് തുക മാത്രം കൈപ്പറ്റിയാണ് മഞ്ജുവാര്യര്‍ ചിത്രത്തില്‍ അഭിനയിച്ചതെന്നാണ് നിര്‍മാതാവ് കലൈപ്പുളി എസ് തനു പറയുന്നത്. പിന്നീട് അതിനെക്കുറിച്ച് മഞ്ജു സംസാരിച്ചിരുന്നില്ലെന്നും താനാണ് നിര്‍ബന്ധിച്ച് പണം നല്‍കിയതെന്നും അദ്ദേഹം കൂട്ടിച്ചേര്‍ത്തു.