മലർകൾ പേസുമാ... എസ്‌പിബിക്കൊപ്പം നിന്ന് മനീഷ പാടി; വികാരഭരിതയായി ​ഗായിക വേദിയിൽ പൊട്ടിക്കരഞ്ഞു ,വിഡിയോ 

എസ്‌പി ബാലസുബ്രഹ്മണ്യത്തോടൊപ്പം വേദിയിൽ പാടാൻ കിട്ടിയ അവസരം ഗായിക മനീഷയ്ക്ക് വാക്കുകൾ കൊണ്ട് വർണ്ണിക്കാൻ കഴിയുന്നതിലും അപ്പുറമാണ്. എസ്‌പിബിയും എസ് ജാനകിയും ചേർന്നാലപിച്ച ‘മലരേ മൗനമാ… മൗനമേ വേദമാ’ എന്ന ​ഗാനം ആയിരക്കണക്കിന് ആളുകളുടെ മുന്നിൽ പാടുമ്പോൾ മനീഷ പലപ്പോഴും വികാരഭരിതയാകുന്നുണ്ടായിരുന്നു. എന്നാൽ അതൊന്നും പാട്ടിനെ ബാധിക്കാതെ അതി ഗംഭീരമായി തന്നെ പാടിനിർത്തി. 

എസ് പി ബി തൃശ്ശൂർ ചേതനയുടെ പുരസ്കാരം ഏറ്റുവാങ്ങാൻ എത്തിയപ്പോഴാണ് ഇരുവരും സ്റ്റേജിൽ ഒന്നിച്ചത്. ​ഇതിന്റെ വിഡിയോ സമൂഹമാധ്യമങ്ങളിലൂടെ വൈറലാകുകയും ചെയ്തു.  മനീഷയുടെ പാട്ട് ഏറെ ഇഷ്ടപ്പെട്ട എസ്പിബി അവരെ തലയിൽ കൈവച്ച് അനുഗ്രഹിക്കുന്നത് വിഡിയോയിൽ കാണാം. സന്തോഷം സഹിക്കാനാകാതെ കരഞ്ഞു പോയ മനീഷയുടെ കണ്ണുകൾ എസ്പിബി തന്നെ തുടച്ചു കൊടുക്കുന്നുമുണ്ട്. 

തൃശ്ശൂർ സ്വദേശിനിയായ മനീഷ ടെലിവിഷൻ സീരിയലുകളിലൂടെയും പ്രേക്ഷകർക്ക് പരിചിതയാണ്. തട്ടീം മുട്ടീം എന്ന പരിപാടിയിൽ വാസവദത്ത എന്ന പേരിൽ മിനിസ്ക്രീൻ പ്രേക്ഷകർക്ക് സുപരിചിതയാണ്.